طالبانو ته بې پیلوټه الوتکې چا په واک کې ورکړي؟

وروستیو کې داسې راپورونه خپاره شول چې طالبانو ځینو سیمو کې له بې پیلوټه الوتکو کار اخیستی او ځینو سیمو کې یې بریدونه کړي او یا يې څارنه کړې چې د عامو خلکو اندیښنې یې راپورته کړې وې.

دا ښکاره ده چې افغانستان کې د بې پیلوټه الوتکو فابریکه نشته چې طالبانو پکې جوړې کړي وي او بیا یې یا اخیستې وي او یا یې غلا کړي وي.

په دې کې شک نشته چې دا ډول بې پیلوټه الوتکې چې تر ډیره څارګرې دي، پاکستان طالبانو ته په واک کې ورکړي دي.

د دې بې پیلوټه الوتکو لپاره طالبانو پراخ کمپاین هم وکړ چې په جګړه کې یې د وسله والو مورال لوړ شي او مقابل لوری وډار کړي، خو لږ وخت د طالبانو درې څارګرې الوتکې چې بې پیلوټه یې بولي په نښه او له منځه لاړې.

مالومه شوه چې طالبانو دا الوتکې د پاکستان له استخباراتو ترلاسه کړې وې او طالبانو ته یې ځینو موخو ته د رسیدو لپاره ورکړې وې.

پاکستان په دې وضعیت کې په خپل پوځ او خپلو وګړو باندې دومره پام نه ساتي، لکه پر طالبانو یې چې ساتي.

حتی پوځي جنرالان یې خطر کې اچولي او افغانستان کې یې د طالبانو لیکو کې ځای په ځای کړي چې جګړه له نږدې رهبري او د پاکستان موخې په اسانۍ ترلاسه کړي، دا کومه نوې خبره هم نه ده.

له بې پیلوټه الوتکو سره د پاکستان د ټکنالوجۍ ټیمونه هم شته، ځکه طالبان خو نه په قران خبر دی، نه په دیني علومو او نه په ساینسي علومو چې له بې پیلوټه الوتکې کار واخلي، دا هر څه د پاکستان د استخباراتو له لوري تنظیم کیږي.

ایا یو څوک به راوښيي چې د طالبانو په لیکو کې حتی د لیسانس په کچه وسله وال شته چې جګړه دې وکړي، خو ټول یې له موره او کوره مرور راټول کړي چې نه په دین خبر دی او نه په ژوند، یواځې د خلکو وینې تویدل ورته تر ټولو غوره لار ښکاري او ځآن ته په کاذبو القابو باندې ژوندي دي.

د بې پيلوټه الوتکې له کاریدو سره یو ځای همدا پوښتنې دي چې طالبان څنګه توانیدلي چې بشري قوه کې داسې کسان پيدا کړي چې وروستۍ ماډل ټکنالوجۍ باندې پوهیږي او د جګړې په کرښو کې بې پیلوټه الوتکه کاروي.

طالبان به دې منکر وي چې د پاکستان ملیشه نه ده، خو له دې نه شي منکر کیدلی چې ځینې واقعیتونو څخه سترګي نه شي پټیدلی او دا د دې ښکاره ثبوت دی چې څنګه طالبان د هر ډول ټکنالوجۍ څخه برخمن دي، په داسې حال کې چې په کاریدلو یې هم څوک نه پوهیږي، خو ښکاره ده چې دا ټکنالوجي څوک ورکوی، ولې یې ورکوي، له طالبانو په بدل کې څه غواړي او موخه څه ده؟