روژتۍ لنډۍ- لسمه برخه

 

  

اخر به ما په چا حلال کړې

چې د روژې په میاشت کوې اشارتونه

 

زما روژه خو دې برباد کړه

چې پر دیوال ښکاره کوې سپین مړوندونه

 

اشنا چې تلو دومره یې ووې

تر څو روژه وي، نور به نه وي دیدنونه

 

د سږنۍ روژې له پاره به دا د روژتیو لنډیو وروستۍ برخه وي. د دې برخې له پاره مې هم بیخي نوې روژتۍ لنډۍ راټولې کړې دي، هیله ده چې خوښې مو شي:

 

روژه لا تللې نه ده شته ده

دیدن به پرېـږدو لا څو ورځې پاتې دینه

 

اختر نږدې دی روژه لاړه

زۀ کم نصیب به غاړه چا ته ورکومه

 

د روژې څو ورځې دي پاتې

دا میلمنه ده مراعات به یې کوونه

 

اخر به ما په چا حلال کړې

چې د روژې په میاشت کوې اشارتونه

 

پام دې وي دې ته چې روژه ده

ریبار دې ستون کړه چې روژه هم تېره شینه

 

زما روژه خو دې برباد کړه

چې پر دیوال ښکاره کوې سپین مړوندونه

 

اخر به زه له روژې تېر شم

ته چې دا سپینه سینه ږدې پر دېوالونه

 

چې بوزه راشې بیا وخانده

اوس خو روژه ده بې خندا بې تېرونه

 

زموږ په کور کې څه شی نه شته

بې له روژې نه موږ روژه یو په کلونه

 

اسماني تندر شوې جانانه

چې په روژه کې دې رالوڅ کړل مړوندونه

 

اشنا چې تلو دومره یې ووې

تر څو روژه وي، نور به نه وي دیدنونه

 

روژه روانه ده خلاصېـږي

خو خلاص به نه شي ستا جفا او ستا جنگونه

 

اشنا روژه ده مخ دې پټ کړه

چې ناروا دي په روژه کې دیدنونه

 

روژه کې هر څه په احتیاط وي

چې په مخ راشې ما نه تښتي احتیاطونه

 

اشنا مې توت لاندې ویده و

ملا جان وايي خوب روژه مکروه کوینه

 

په روژه مات کې راپه یاد شوې

زړه کې مې تېر شول چې اشنا کله راځینه

 

اشنا له هرڅه راته خوږ دی

خو په روژه کې یې بند کړي دیدنونه

 

اشنا دې تل خوشحاله اوسي

روژه چې تېره شوه دیدن ته یې ورځمه

 

اشنا دې کړم خبر مې ناخلې

روژه پلمه ده، ته مې ناخلې احوالونه

 

اشنا له ما سره پخلا و

پخلا اشنا رانه روژه لرې کوینه