د اسلام اباد پر لور د عمران خان لاریون

د اسلام اباد پر لور د عمران خان لاریون؛ د پلازمېنې مهمې لارې تړل شوې.

په پاکستان کې پخواني لومړي وزیر عمران خان د پلازمېنې اسلام اباد پر لور نن چارشنبه د لاریون اعلان کړی، خو حکومت وايي، نوموړي ته به پلازمېنې ته د ورتلو اجازه ورنکړي او مخه به یې ونیسي.

ښاغلی خان وايي، لاریون به له پښتونخوا پيلوي او د ده په خبره دا به د پاکستان په تاریخ کې تر ټولو لوی لاریون وي، خو د واکمن ګوند سیاستوالو بیا دې لاریون ته د “خوني لاریون” نوم ورکړی دی.

پلازمېنې اسلام اباد ته تلونکې او راتلونکې لارې ټولې لارې تړل شوې دي.

له هغه وروسته چې حکومت وویل د عمران خان تحریک انصاف ګوند ته به د پلازمېنې په سرینګر های وې سیمه کې د احتجاج اجازه ور نه کړي، ښاغلي خان وویل، ډي چوک یا څلور لارې ته به د غونډې لپاره لاړ شي.

د اسلام اباد دوو مهمو لویو لارو جناح ایونیو او شاهراه دستور په سر کې دا څلور لارې له دې کبله هم مهم ځای بلل کېږي چې دې ته نژدې ډېری بهرني سفارتونه هم موقعیت لري.

ښاغلي خان د لاريون اعلان د پښتونخوا په مرکز پېښور کې په یوه خبري غونډه کې وکړ او د پاکستان د اوسني سیاسي او اقتصادي بحران یواځينی حل يې ټولټاکنې یادې کړې او غوښتنه يې وکړه، چې باید ژر تر ژره ټولټاکنې اعلان شي.

عمران خان وايي، “د دې ټولو ستونزو یواځینی جمهوري حل دا دی چې ټولټاکنې دې وشي او ژر تر ژره باید وشي.

تر دې هاخوا يې بله هېڅ لاره نشته. هر څه چې تاسو کوئ، دغه هېواد به نور هم شاته ځي. او زه وېرېږم، چې موږ د شري لنکا لور ته روان یوو. هغه حالات چې د شري لنکا دي، زه وېرېږم، چې موږ به په میاشتو نه، بلکې په اونیو کې هغې حالت ته ورسېږو”.