د طوطیانو نړۍ واله ورځ

نن ورځ په موبایل کې راته یو مسیج راغی او راته یې لیکلي وو چې نن دمی ۳۱ نېټه  دطوطیانو نړۍ واله ورځ ده .ماهم لازمه وګڼله چې پر طوطیانو  یو څو ټکي ولېکم.

طوطي چې په انګریزی ژبه یې (Parrot)بولي په هندي او اردو ژبو هم ورته طوطا او په عربي ژبه یې( ببغا ء) بولي .

په کوم ځای کې چې زه ژوند کوم دلته هم طوطیان ډیر دي په تېره بیا زماکو ر ته  مخامخ دمیوو او ګلانو یو ستر فارم دی چې هره ورځ یې په لوړو او دنګو ونو کې طوطیان ناست وي او هماغلته یې ځالې او کورونه دي .

طوطیان زیاتره په هغوسېمو کې ژوند کوي چې ګرمه او توده هوا ولري او یاهم نېمه ګرمه او توده وي .

تر اوسه دنړۍ په بېلابېلو برخو کې دطوطیانو (۳۹۸) ډولونه شته .

طوطیان ښایسته پڼکې لري اوپه مارغانوکې یو هوښیار مرغه ګڼل کیږي او هرې خبرې ته په ډیر غور سره غوږنیسي اوبیا یې پخپلې حافظې کې ثبتوي.

طوطیان خوراکي توکي زر نه خوري ، لومړی پخپله خوله کې دهغو مزه څکي چې ایا دخوړلو وړدي یانه دي .دوی پخپلو خوړو کې دمیوو اودځینو ونو دمیوو دمغزونو نه ګټه اخلي ، خو دطوطیانولپاره چې کوم خواړه ښه نه دي هغه دادي : چا کلیټ ،ککاو، غوړ خوراکونه ،غوښه او مشروم دي .

زما يو آشنا چې دهند دراجستهان دایالت اوسیدونکي و هغه راته ویل چې په راجستهان کې هم ډیر طوطیان شته او هلته دمر چو په پټیو کې مرچک خوري.خیني طوطیان تر ۳۵ کلونو پورې عمر کوي خو دخینو طوطیانوعمر تر اویاوو کلونو پورې هم رسیږي .

طوطیان دنړۍ په  دېرو هېوادونو هندوستان ، پاکستان ، بنګله دیش ، دجنوبی ایشیا په هېوادونو ، آسټرالیا ، جنوبي امریکې اوافریقایی هېوادونو کې ډېردي.