د ډاکټر نبي مصداق د لومړي تلین په پار

افغانستان یو بل د ککري خاوند له لاسه ورکړ.

اوس چې دلته ناروې کې د شپې درې نیمې بجې دی، د خوب په نیت مې خپل کار مې بند کړ، خو مخکې له دې چې کمپیوټر مې بند کړم د عادت له مخې مې فیسبوک ته سره ورښکاره کړ د هر څه مخکې مې د ښاغلی ډاکټر نبي مصداق د مړینې په دردونکی خبر سترګې لمدې شوې. انا لله و انا اليه راجعون.

زما د کلونو کلونو مهربانه دوست او ملګري ډاکټر نبي مصداق چې له انګلستان نیولې، تر امریکا او بیا په دا وروستیو کلونو کې خپل افغانستان کې تل په اړیکه کې وو د ملګرتیا تر څنګ یې کلونه کلونه دعوت مجلي او دعوت ميډیا ته ډېرې لیکنې کړي دی، او هم ورسره ما شخصاُ ډیرې مرکې کړي دي. دوه کاله مخکې مې وروستی ځل په کابل کې چې د ولسمشر سلاکار وو، د بهرنیو چارو وزارت تر څنګ د هغه په دفتر کې سره ولیدل. په لنډ ډول مو د زړه دردونه شریک کړل. چای مې ورسره وڅښه، ډیر ټینګ شو چې بله ورځ یې میلمه شم، ورته ومې ویل ستاسو لیدل مې غوښتل زه د حکومتي غټانو ډوډۍ نه خورم او هر څومره نژدې دوست مې چې په واک کې وي اړیکه ورسره نه پالم، خو نه پوهیږم تاسو ته ولې راغلی یم. ښه یې وخندل ویل یې دا درې میاشتې وشوي د ولسمشر چې مشاور یې یم نه مې دی لیدلی، دا زموږ حکومتي غټوالی دی. دواړو ښه په کړس کړس وخندل. د تلیفون او نت د لیارې تل په تماس کې وو، د کرونا یې څو ورځې مخکې خبر شوم، دې ته منتظر چې یو څه ښه او څو ورځې تېرې شي زنګ به وروهم، خو مرګ د چا انتظار نه کوي.

دا په دې لنډو ورځو کې زما د دریو شخصي دوستانو او د دردېدلی افغانستان اصیلو بچیانو ارواښاد مصطفي عمرزي، استاد رسول باوري او دا اوس مصداق صاحب یو د بل پسې د سولې په ارمان د خاورو میلمانه شول.

خبره نه اوږدوم. د لوی او بښوونکې څښتن څخه ډاکټر نبي مصداق ته د فردوس جنتونه او کورنۍ، دوستانو او مینه والو ته یې د زړه صبر غواړم.