د لنډیو په څپو کې د تړلو ښوونځیو ازانگې/۴

لنډۍ، د ثبتولو ستونزه

یوسلویواویایمه برخه

د سل او زر خبره نه ده

اوس د لکونو نجونو بند دي مکتبونه

 

ښوونځی پروت دی چېرې نه ځي

گناه زموږه چې مو پښې تړلي دینه

 

له ښوونځي یې ځواب راکړ

زه کم نصیبه به اوس کوم لوري ته ځمه

دا هم د نجونو د ښوونځيو د تړل کېدو او د نجونو د تعلیم ستونزې پورې اړوند څو نوي لنډۍ:

خدایه ته خپله مرستندوی شي

دا ظالمان خو ښوونځي نه خلاصوینه

 

د سل او زر خبره نه ده

اوس د لکونو نجونو بند دي مکتبونه

 

ښوونځي تگ وختونه راغلل

چې وي تړلی، زه به چېرې ولاړه شمه

 

چې ښوونځي یې ورته بند کړل

نجونې ښېرې ورته کوي تباه به شینه

 

مکتب تړلی هک حیران دی

چې نجونې چا کړې مرورې، نه راځینه

 

ښوونځی پروت دی چېرې نه ځي

گناه زموږه چې مو پښې تړلي دینه

 

زه ښوونځی مرور نه یو

طالب ظالم مې غبرگې پښې تړلې دینه

 

چې ښوونځی و، پام مې نه و
اوس چې تړلی پسې کومه ارمانونه

 

چې مکتب غواړې غږ دې جگ کړه

په اسانۍ به یې دوی نه درخلاصوینه

 

ښوونځی خامخا خلاصېـږي

خلاص خو به خلاص شي، خو چې زه به چېرې یمه

 

د ډېرو ږیرو هلالا کې

ښوونځی بند دی لیونی گرځم میینه

 

له ښوونځي یې ځواب راکړ

زه کم نصیبه به اوس کوم لوري ته ځمه

 

اوس د بریا خندا کومه

بېگاه مې خوب لید، ښوونځي راخلاصوینه

 

مکتب تعلیم نه به لاس ناخلم

که مې طالب سبا تر دار ورسوینه

 

غږ به مو څوک واوري عالمه

مغرور واکمن پر نجونو تل کوي ظلمونه

 

چې له مکتب ولې ډارېـږې

مکتب کې نه شته تا گڼلي پساتونه

 

خلک مکتب او پوهه غواړي

څو سرتمبه ورته ولاړ نه یې پرېـږدینه

 

مور ځکه نجونو ته زورېـږي

په ښوونځي پسې وړې سلگۍ وهینه

 

په ژړا بېرته نجونې راغلې

مور ته یې ویلې چې مکتب نه خلاصوینه

 

بد زیری دغه دی بیا راغی

چې ښوونځي د جنکو تړلي دینه