روژه والې لنډۍ/ دریمه برخه

پړشمي خوب رانه قضا کړ

د نن روژه به په ځان څنګه تېرومه

پړشمی داسې برکت دی

چې پیغمبر یې په حدیث امر کوینه

پړشمی دومره لوی ثواب دی

چې پاک رسول  یې برکت ګڼي مینه

پړشمی ستا په چورت قضا شو

  اوس ده ناوخته ملایان آذان کوینه

پړشمی یو مخ برکت دی

د روژماتي ماښامونه اخترونه

پلار رمضان، مور یې روژه ده

لور یې خرما ده روژتیان خوشحالوینه

پورې لیلا ګوره تراوېح کړي

قبول یې مه شه تور وربل په خاورو ږدینه

په اخلاص پورته شئ روژه شئ

د مومنانو روژه یوه میاشت وي مینه

په انتظار روژه په خوله یم

 ملا ګونګی شې ولې نه کړې آذانونه

په آخرت کې به نارې کړم

د پړشمي ملان مې سخت آزاروینه

په پټو سترګو پړشمی کړي

د ځوانۍ خوب یې لکه بنګه زنګوینه

په پړشمي کې به نارې کړم

زه له خواږه خوبه روژې ویستلی یمه

په پړشمي کې چې را یاد شې

زړګی مې را ډک شي په نهاره ویده شمه

په پړشمي کې را په یاد شوې

تر روژه ماتي پورې وږې ګرځېدمه

په پړشمي کې سوال قبلېږي

چې په روژه کې درنه هېر نه شم مینه

په پړشمي کې مې را یاد شوې

 حیران په دې یم ورځ به څنګه تېرومه

په پړشمي مې ته راويښ کړه

د روژه ماتي غم به زه درته کومه

په پړشمي یې غېږه راکړه

تر روژه ماتي ړنګېدمه، زنګېدمه

په تا روژه څنګه تېرېږي

ما ته د زړه له درده نه راځي خوبونه

په تراوېح کې را په یاد شو

صلات وتر مې په تاستې کړي دینه

په تراوېح کې مې را په یاد شوه

ملا ولاړ وو زه سجدې ته تللی ومه

په خوشحالۍ راځه جانانه

روژه شوه خلاصه، آزاد شوي دیدنونه

په رمضان کې دې مین کړم

زه به روژه نیسم که ستا یاد به کومه

په روژه تیانو زېری وکړئ

ماښام نږدې دی اوس به وشي آذانونه

په روژه ښه عبادت وکړه

خدای به مې درکړي، اندېښنه مه کړه مینه

پاملرنه: د روژه والو لنډیو موضوع د رمضان په ستر دیني او اخلاقي اهمیت سربېره په ټولنه کې د مینې، محبت، سولې، یووالي، پردېسۍ او داسې مسائلو هم بحث کوي. په ځینو لنډیو کې د روژې کلمه د اشارې، تشبیه، استعارې او کنایې په توګه کارول شوې او لنډۍ ته یې نازکخیاله بڼه پوښلې ده. د روژه والو لنډیو څلورمه برخه به ژر خپره شي له موږ سره اوسئ…