زما چک خو داسې نه و/ اباسین بریال

ددې دار سر ته مه ګورئ چې څوک راځوړند دي، ددې دار بیخ ته وګورئ! دا مخ پټي جلادان خو ددې وطن د پلرونو اولاد نشي کېدای. که دا د هغه ناميانو اولادونه وي نو دا نطفه چټله او نکاوې فاسدې دي.
زما په چک کې خو خلکو تر اوښکو رڼې اوبه څښلې، تر شاتو خوږې مڼې یې خوړلې. ددې سیمې نالوستی زلمی د قوم پیغور و. ددې وطن زلمیان خو د پوهنتونو په ټولګیو او لیلیو کې نه ځاییدل. په دې وطن کې خو به دې چې په هر لاروي پسې غږ کاوه نو یا به د د ډاکتر یا اینجنیر پیشوند ورکاوه. نن څه وشول چې ډاکتر ترهګر شو، او انجیر يې د قتل په تور په دار زانګي؟ داڅه ګورم دلته لکه چې محشر دی. ددار بیخ ته وګورئ! دا بریتور او هډور کلیوال هماغه پښتانه دي چې امیر کروړ یې په اتلولۍ نازیده؟ ایا دا اتلان دي همدا بګېل مړزان یادوم چې د خپل منصور ننداره کوي او د طالب په مخ کې لکه د سپارټاکاس مریدان بې دمې ولاړ دي؟ نه نه دا نطفه چټله شوې دا نکاوې فاسدې شوې دي.
دلته تاسو د زرګونو انجنیرانو، ډاکترانو، خبریالانو او سربازانو د پانسۍ له یکي یوې پېښې خبر شوی. دلته محشر دی دلته هره ورځ د یوه انسان قصابي کیږي. په دار دځوړندو سرونو تماشا ددې کلیوالو ورځنۍ سرګرمي ده. دا مسلخ دی د کادرونو مسلخ. دې ځای ته سیوکه وايي دلته د طالب محکمه ده د سواد په ګناه نیول شوي زلمیان پکې پانسي کیږي.
دې سیمې ته له کابله دغولکې ګاټی رسېږي خو کله هم فتحه نشوه. ددې لایت پنځو دسولې، جنګ او فرهنګ وزیرانو په ټول وطن واکمني وکړه خو خپل کور يې ونه ژغوره. خپل زلمیان يې ددار په څوکه لیدلي، ترهګر يې د عزیز تر کور او شکوره رسیدلي خو دوی شوک ندی خوړلی د خپل عزیز له بدې ورځې کله هم ندي خبر شوي. ددوی اولادونه د نړۍ په معتبرو ښارونو کې تحصیل کوي. دوی د ښار په ماڼيو کې په وريښمینو بالښتونو ویده دي.
دا انجام ندی دا اغاز دی، د یو لوی نسل د تباهۍ اغاز. ددې سیمې سلو زلمیانو ته مې درس ورکاوه، اوله ورځ مې ځنې وپوښتل پخپل ولایت کې د جنګ په اړه څه فکر کوئ؟ یو راجګ شو په پوره غرور يې راغبرګه کړه؛ (( دلته چې څوک ناست دي یو به داسې نه وي چې يوځل يې سرشانه یي راکټ نه وي توغولی))
اوس دلته په مکتب، مدرسه، جومات، دیره او پیتاوي کې د جنګ بندوبستونه کېږي، دانسل د طالب په لښکر بدلیدونکی دی په دې نسل طالب نښه نیولې. دا نسل وژغورئ د خدای پار دی په دار د ځوړند انجنیر د بورې مور او بچو په روی په وردګو رحم وکړئ. ګني هرڅه لاړل يوه پېړۍ به په دې تیريږي چې له لاسه ورکړی دانسل ووژنو او وطن آرام کړو.
ستاسو اوښکې او غندل هیڅ اور نشي سړولای. لاس ورکړئ سرکار بیدار کړئ چې د کابل ددې دروازې د طالب سازۍ فابریکې ویجاړې کړي.