د حکومت دوامداره چوپتیا/ ملالۍ رڼا

په داسې حال کې چې په ټولو لویو سیاسي او نورو ملي مسایلو کې تر هر څه لومړی حکومتونه دا مسوولیت لري چې خلکو ته مساله يا ستونزه روښانه او هغوی ترې په واضحو ټکيو کې خبر کړي، خو په خواشیني سره د دې ځای د یادو حکومتونو دا چاره يو داسې عادت ګرځېدلی، لکه همدا کار يې چې د ټولو کارونو په سر کې وي او په سیاسي برخه کې يې تر ټولو لویه موخه دا وي چې پر ملي مسایلو ځان ګونګی کړي.
که د لوستونکيو په یاد وي، کونړ دوه کاله پرله‌پسې د پاکستان له خوا په درنو توپونو وويشتل شو، خو د کابل چارواکي ورته ګونګه خوله ناست او په دومره اوږده موده کې يې پاکستان ته اخطار څه چې له هغوی يې يوه وړه ګيله هم و نه کړه.

ورپسې په ختیزو ولایتونو کې د پاکستان ملېشو د قبایلو څلوېښت کيلومټره خاوره رالاندې کړه او ان د ننګرهار د ګوشتې سیمې يې ونيولې، خو د افغانستان د حکومت پرې پروا نه وه او له ځانه يې کڼه مرغۍ جوړه کړه. په دې پسې پاکستان د کندهار او هلمند په ولايتونو کې څو کيلو مټره راوړاندې شو، خو هلته هم د پخوا په څېر د افغانستان حکومت ځان حسن چپ کړ او يوازې د کندهار امنیه قوماندان يې په خپل سر مقابله شروع کړه.
د حکومت همدغه پرله‌پسې چوپتیا ده چې خلکو ته يې پوښتنې راپیدا کړې، افغانان په دې هک پک دي چې د تېرو شپېتو کلونو په اوږدو کې يوه حکومت هم پاکستان ته ځان داسې غلی کړی نه دی او نه يې د داسې بېوسي ننداره وړاندې کړې، لکه دغو حکومتونو چې په عمل کې پلې کړه.

د افغانستان د حکومتونو همدغو چوپتیاوو په پای کې د پاکستان يرغلګر حکومت ته دا جرات ورکړ چې دا دی، اوس په دې هلو ځلو کې دی چې د پښتنو قبایلو پراخه سیمه رسمي تر خپلې ولکې لاندې راولي او هغه قبایل چې تل يې ځانونه زموږ د خاورې برخه ګڼلي او د افغانستان د خپلواکي په ګټلو کې يې خپل سرونه ښندلي، غلامان او د پنجاب جغ يې پر څټونو کښېږدي، خو د همدغه ستر جنایت پر وړاندې د افغانستان حکومت ګونګه خوله دی. زموږ د حکومت دا چوپتیا دا مانا لري چې یا خو ډېر بېوزلی او یا هم د کوم تړون له مخې په روانه موضوع کې چوپه خوله دی. که له دې دواړو هر يو علت وي، تاریخي قضاوت يې پرته له ملي خیانته بل څه ګڼلای نه‌شي.

د حکومت یاده او پرله‌پسې چوپتیا دا مانا لري چې اوسنی حکومت د خپلو اتباعو او وروڼو قومونو پر وړاندې نه کوم مسوولیت لري او نه هم د افغانستان ملي ګټو ته ژمن دی. په کار ده چې د دې ځای چارواکي د قبایلو د پراخې خاورې په اړه چې په تاریخي لحاظ يې اصلي واک په افغانانو پورې اړه لري، له خپلې خولې د ګونګتیا مهر لېرې کړي او ولس ته روښانه کړي چې خبره چېرته ده!؟

سرخط ورځپاڼه