هوګو لارنس؛ پر پاکستان به فشار نور هم زیات شي

په کابل کې د امریکا سرپرست سفیر وايي، واشنګټن به د خپلې نوې سټراټېژۍ له مخې د افغانستان په اړه پر پاکستان فشار زیات کړي.
هوګولارنس چې نن یې په کابل کې په هېواد کې د ناټو د غوڅ ملاتړ ماموریت له مشر جنرال جان نیکلسن سره یوځای په یوه خبري غونډه کې خبرې کولې وویل، که پاکستان په سیمه کې دترهګرو ډلو ضد عملي ګام پورته نه کړي، زیات زیان به وکړي.
ښاغلي لارنس طالبانو ته په خطاب کې وویل، د جګړې او یا هم د سولې مذاکراتو کې د یوه د ټاکلو پر مهال له دقت کار واخلي.
په ورته وخت کې په افغانستان کې د ناټو د غوڅ ملاتړ ماموریت قومندان جنرال جان نیکلسن د افغانستان او جنوبي اسیا په اړه د امریکا له نوې سټراټېژۍ په هرکلي سره وویل، امریکا او ناټو به اجازه به ور نه کړي چې افغانستان یو ځل بیا د ترهګرو ډلو په خوندي امن ځای بدل شي.
هغه زیاته کړه، طالب او داعش ډلو ماتې خوړلې او امریکا به ډېر ژر په دې جګړه کې بریالۍ شي.
په افغانستان کې د امریکا او ناټو ځواکونو عمومي قومندان وویل، د افغانستان او جنوبي اسیا په اړه د امریکا د سټراټېژۍ له مخې په افغانستان کې د ناټو ماموریت دوام ولري او له دې وروسته به د جګړې په میدان کې هېڅ ډلې ته وخت ور نه کړل شي چې سرپورته کړي.