معلولان د مافیا په منګولو کې

جګړې جنګ‌سالاري او توپک‌واکي را منځ ته کړه، د غصب وبا يې خپره او د قانون لمن يې تار تار کړه، ټولنيز ارزښتونه او مناسبات يې وزيانول، يو په بل پسې يې مافيايي کړۍ او شبکې را منځ ته کړې، د هيروينو د قاچاق پر هغو برسېره، د وسلو پېر او پلور، استخباراتي لوبو او انساني قاچاق شبکو زموږ پر خاوره خپلې اډې پرانيستې دي، تر دې چې د سوالګرو او معلولانو مافياوو هم د خلکو پر ژوند خپل تور سيوری غوړولی دی.

د سوالګرو مافيا داسې منګول ښخه کړې چې بهرني سوالګر يې هم دلته را مات کړي، تر دې چې ايران خپل روږدي هرات ته را پارسل کړي دي.
دا اوازه اوس حقيقت ګرځېدلی چې د سهار په خړه کې د ښار بېلابېلو برخو ته سوالګر په موټر کې راوړل کېږي او ماښام بېرته په ګاډو کې له ښاره ټولېږي.
تاسې به هم ليدلي وي، که مو نه وي ليدلي کيسه يې دا ده چې د ښار په ځينو برخو کې ناقانونه پارکينګ او د لسګونه غرفو کرايه د معلولانو په لاس د مافيا په خزانه کې لوېږي.

په ظاهر کې په دغسې ناقانونه پارکينګونو د معلولانو قبضه ده، خو شا ته يې يوه لويه او خطرناکه مافيا پرته ده چې په مټ يې معلولان نه پر ښاروالي ری وهي، نه يې ټرافيک او پوليس مخې ته درېدای شي.

د کابل سيند پر غاړه له پل‌باغ عمومي تر پل‌خيشتي درېدلو غرفو کرايه او ملکيت معلولانو په خپل لاس کې اخيستی، د ښار په نورو برخو کې هم زورواکيو، د معلولانو په استخدامولو ډېری ځايونه په دغه بڼه لاندې کړي دي.
زورواکي او سياسي بدماشانو معلولان د ټاکلي معاش يا کمېشن په بدل کې د پارکونو او عامه ځايونو پر غصب له ګومارلو داسې شبکه را منځ ته کړې چې پوليس او ښاروالي يې يا پر وړاندې نه‌شي درېدای او يا يې په دې ماجرا کې لاس ورسره يو کړی.

د ښار په ډېری برخو کې د لاسي پلورنځيو، غرفو او پارکينګونو کرايه هره ورځ د معلولانو په لاس دغې مافيا ته رسېږي.
د بسونو تم‌ځايونه د پلورنځيو په پار همدغې مافيا په غصبولو په کرايه ورکړي.
دوی بېلابېلې لويې وړې ډلې جوړې کړې چې له امساوو، لرګيو او جګسو سره پر پوليسو ور دانګي، ان د بسونو په اډو کې يې هم له ګاډو غونډه ټيکس ټولولو ته مخه پرانيستې ده.

له معلولانو سره خواخوږي او مرسته د مينې، ملي او انساني فريضه ده، خو دلته يو شمېر معلولان د زورواکيو او بېلابېلو مافيايي ډلو چوپړ ته استخدام شوي دي.
په داسې حال کې چې ګڼ شمېر معلولان پر خواري او بې‌وزلي محکوم دي، يو شمېر نورو يې د نورو په مټ د بدماشي او غصب بازارونه تاوده کړي چې له امله يې ښاري ژوند او سيسټم له ګواښ سره مخامخ کړي دي.

سرخط ورځپاڼه