اقصی په بيت المقدس او د سلطان‌خېلو جومات په مومندره کې

د افغان حکومت يې کور ودان، هوښياري يې وکړه چې د ټرمپ دغه کار يې وغانده، که نه نو اوس به مظاهرچيانو زموږ خپلې حکومتي ودانۍ له بېخه نړولې او سوځولې وای.
بدمرغي دا ده چې د مظاهره‌چيانو لويه برخه بيت المقدس نه پېژني. يوازې د اقصی جومات نوم يې اورېدلی او فکر کوي چې هلته يوازې همدا يو ځای د مسلمانانو له‌پاره مقدس دی، نور نه سپېڅلي ځايونه لري، نه د نورو دينونو پيرويان ورسره کومه ديني اړيکه لري.

د دوی لويه برخه پر دې نه دي خبر چې ولې بيت المقدس له پېړيو راهيسې د دريو اسماني دينونو د پيروانو تر منځ د ټکر ځای دی او ولې د دغو دينونو تر منځ لاس په لاس کېږي.
دوی حتا په دې هم نه پوهېږي چې يهود ولې تر بيت المقدس نه تېرېږي او تر ځان تېر دي، خو بيت القدس خپله پلازمېنه غواړي.

خو څه چې رښتيا ده هغه دا ده چې دغو مسلمانو مظاهره‌چيانو دوه تاوانه کړي دي، يو يې اقصی جومات له ګوتو وتلی، بل يې د سلطان‌خېلو جومات پرون د وينو ډنډ و.
فرق دومره دی چې په اقصی مظاهره کېږي او د سلطانخېلو د جومات په وينو ککړ دېوالونه تر مظاهرو وروسته پرېمنځل کېږي، خو غبرګون نه ورباندې ښوول کېږي.
فرق دا دی چې اقصی د نورو لاس ته لوېدلی او د سلطان‌خېلو جومات د داسې په چا په لاس ويجاړ او د وينو په ډنډ بدل شوی چې ځان مسلمان بولي او د اسلام دعوه کوي.

دواړه د خدای کورونه دي، په يوه کې د خدای په عبادت ولاړ کسان په خپلو وينو کې لټ په لټ اوړي، په بل کې څوک د لمونځغاړي سر نه وهي.
موږ د افغان مسلمان انسان په توګه تر مرګه هم نه‌شو منلای چې بيت المقدس دې د بل چا لاس ته ورشي، بيت المقدس زموږ له‌پاره تر هغه ډېر مقدس دی څومره چې يې عرب دعوه کوي، خو ګيله دلته ده چې ايا زموږ د سلطان‌خېلو جومات د خدای کور نه دی، که پکې په لمانځه ولاړ انسانان د دې سزاوار وو چې خپل خدای ته د عبادت پر مهال اندام اندام شي؟

په بيت المقدس د دينونو تر منځ شپاړس ځله داسې بريدونه شوي دي چې د هغه ځای اوسېدونکي يا له يوې مخې قتل عام شوي او يا ښار بشپړ له منځه تللی دی.
هلته درې اسماني دينونه بېلابېل سپېڅلي او مقدس ځايونه لري او له همدې امله له پېړيو راهيسې د هر دين پيرويان بېلې بېلې هڅې کوي چې د ځان يې کړي.
هلته د ندبه دېوال او د مقدس قبر کلیسا هغه ځایونه دي چې یهودانو او مسیحیانو ته سپیڅلي دي.

تر قبه الصخره لاندې کاڼي بیا دریو واړو دینونو ته سپېڅلي دي او د اقصی جومات بيا د ګران پيغمبر حضرت محمد «ص» د معراج د کیسې له‌ امله مسلمانانو ته ځانګړی اهمیت لري او په دې سربېره، دا ځای یو وخت د مسلمانانو قبله هم وه.
بيت المقدس چې هر چا لاندې کړی په زور يې لاندې کړی او په زور يې له لاسه ايستل شوی دی. په مظاهرو يې سر نه سره ورځي.
ښه ده چې د سلطان‌خېلو د جومات پر شهادت وژاړو، چيغې ووهو او دغه بلا له خپله کوره وشړو.
ملنګ دې ځان ته دعا وکړي
چې در په در په کلي نه غواړي خيرونه

سرخط ورځپاڼه