د ښارونو بدې پېښې به بدې پايلې ولري

دوې شپې وړاندې د کابل په خيرخانه کې وسله‌وال کسان يوه کور ته ننوتلي وو، چې څوک په مخه ورغلي، په شهادت يې رسولي دي، لس کسه شهيدان شوي او بريدګر هم سرې سترګې په ډاډه زړه له کوره بېرته وتلي دي.
په دغو شهيدانو کې ښځې او ماشومان هم شامل دي او دوه تنه خو هغه مېلمانه دي چې له کلي څو شپې کابل ته راغلي وو.
د همدې شپې په ماښام د کابل په درېيمه حوزه کې چاودنې ګڼ شمېر کسان شهيدان او ټپيان کړل.

تر هغه ور هاخوا په همدې خيرخانه کې څو ورځې وړاندې په رڼا ورځ يو صراف وويشتل شو او قاتلان يې په ډاډه زړه د پېښې له ځايه ولاړل.
هدفي وژنې، سړي تښتونې، غلاوې او نورې نادودې نه يوازې په کابل کې په درز روانې دي، بلکې په نورو ولايتونو کې يې هم پرېماني ده او بده لا دا ده چې عاملان يې نه نيول کېږي.

د ښار په منځ کې سړی ووژني، په ډاډه زړه روان شي. سړی وتښتوي له ښاره يې په بې‌غمي وباسي. چاودنه وکړي، کور ته ور واوړوي، خلک ولوټي، بس رسنۍ ورباندې راپور جوړ کړي، نور نو غل صاحب خپله مخه وهي، هېوادوال خپل غم ژاړي او امنيتي ارګانونه د يوې بلې ورته پېښې د خاموشې نندارې په تمه ناست وي.
که رښتيا هم افغان حکومت د ښارونو ساتنې ته توجه زياته کړې وي، ساتنه داسې وي؟

که يې توجه نه وای زياته کړې، په ښارونو کې به څه حال و؟
حکومت به يا د ښارونو خونديتوب ته پام کړی وي، يا نه، خو رښتيا دا ده چې نور نو په ښارونو کې د خلکو حوصله ختمه شوې ده.
په لويو ښارونو کې دغسې ناامنۍ او د شتمنو کسانو تښتول نه يوازې د خلکو رواني فشار زياتوي، د خلکو او حکومت تر منځ واټن ډېروي، بلکې له افغانستانه د پانګه‌والو د فرار لوی لامل هم کېږي.

هسې مو هم ميليونونه ځوانان بې‌روزګاره دي، ځينې يې پرديو هېوادو ته په خواريو مزدوريو پسې ځي او پر لاره مري، ځينې يې نشو ته مخه کوي او ځينې بيا د ترهګرو ليکو ته ځي، که دغه شته پانګه‌وال هم ووځي او بې‌کاري نوره هم زياته شي، بيا به يې مهارول د حکومت د وس خبره هم نه وي.
خلک د ناامنيو له وېرې ښارونو ته پنا راوړي او دلته چې ښارونه هم داسې ناامنه شي، نه پکې د چا سر خوندي وي، نه مال، نه عزت؛ نو مجبور دي چې د خپل ځان ساتنه پخپله وکړي او هغه مهال به نو بيا ورته حکومت او طالب چندان توپير نه لري.

د بدحکومتۍ او بې‌نظامۍ ترخې تجربې موږ کړې دي، حکومت دې بيا د هغه تجربو د تکرار مخه ونيسي، که نه که حالت همداسې روان وي، پايلې به يې نه د حکومت، نه د خلکو او نه د وطن په ګټه وي.

سرخط ورځپاڼه