قومي سوداګري چندان بازار نه لري/محمد روښان ښاد

یو شمېر افراد، اشخاص او حتی ډلې ټپلې لا هم له قوم، سمت او ژبې څخه د حربې په توګه کار اخلي. کله چې یې واک او ځواک یا شخصي منافع په خطر کې ولوېږي، نو د خپلو پلویانو په منځ کې او یا هم د رسنیو له لارې د قوم، سمت او ژبې خبره را پورته کړي او په رسنیو کې همدغې خبرې ته لمن وهي، حکومت، رهبري او مقامات له هر ډول سند او ثبوت پرته په تعصب تورنوي.

په اریانا تلویزیون کې مې د حکومت د استازي محمد هارون چخانسوري، د ملي وفاق جریان د مشر احمدولي مسعود او د جمیعت اسلامي ګوند د رهبري شورا د غړي ستار مراد بحث لیده. په پیل کې مراد او مسعود پر حکومت عمومي نیوکې وکړې، خو کله چې هارون چخانسوري په مستندو دلایلو او قوي منطق سره پر حکومت د دوی بې اساسه لګېدلي تورونه او ټولې نیوکې رد کړې، هغوی بېخي لاځوابه شول.

بل ځل نو احمدولي مسعود په ولسمشر تور ولګاوه چې د اساسي قانون په لویه جرګه کې ولسمشر غني راته د شل کسانو پر وړاندې ګوتڅنډنه وکړه چې که واک ته ورسېدم، نو د حکومت، تورې او یا بهرنیو په زور مو له هېواده باسم.

د دغه تور په لګولو سره ټولو ته دا معلومه شوه چې ښاغلی مسعود ا و د ده په څېر هغه نور کسان چې د خلکو د اذهانو د مغشوشولو لپاره کرۍ ورځ په حکومت پسې منفي تبلیغات کوي او د منطق او استدلال پر وړاندې چې بې ځوابه پاتې شي، نو بیا د دغسې تورونو لګولو ته مخه کوي چې نه له اصل موضوع سره تړاو لري او نه هم اوسنۍ خبره ده، حتی د یوې نیمې لسیزې مخېکنۍ خبرې په دروغو او رښتیا را سپړي. دوی غواړي په دغه ډول کارونو سره په ولس کې خپل بایللی محبوبیت بېرته جبران کړي او حداقل خپل پلویان او قوم د دغو درواغو تورونو له لارې پر ځان راټول کړي.

کله چې ښاغلی مسعود په دغه بحث کې پر دې پوه شو چې پر حکومت لګول شوي تورونه یې بې اساسه ثابت شول، نو هملته ځای پرځای یې قومي ټیکدارۍ او سوداګرۍ ته مخه کړه. حکومت یې په دې تورن کړ چې له دوی سره قومي چلند او تعصب کوي، حال دا چې اوس ټول ملت په دې خبر دی چې احمدولي مسعود او د دوی په څېر نور کسان د دې هېواد او ولس لپاره نه یوازې د پرمختګ، ثبات او امنیت کومه برنامه نه لري، بلکې دوی هره ورځ د دغه بېچاره ولس د وینو زبېښلو کوښښ کوي.

عجیبه داده چې همدغه ډلې ټپلې د حکومت د ملي او اقتصادي برنامو او پروژو د تطبیق پر وړاندې خنډونه ایجادوي او بیا بېرته حکومت ته دا پېغور هم ورکوي چې حکومت حتی په دوه کالو کې د برېښنایي تذکرو په وېش ونه توانېده. دا په داسې حال کې ده چې د دغو تذکرو د وېش پر وړاندې همدغه ټلواله او ځینې نور افراد او اشخاص هره ورځ د بهرنیو استخباراتي کړیو په لمسون او اشارو ستونزې ایجادوي او د دغې پروسې د مخنیوي او ځنډولو کوښښونه کوي.

د احمدولي مسعود او د ده په څېر د نورو قومي ټېکدارانو پلویان دې پر ځان رحم وکړي د هغوی پر کړنو دې یو ځل بیا غور او دقت وکړي چې دوی په پټو سترګو ورپسې اقتدا کړې، ځکه چې دوی یې په غلطه روان کړي او که چېرې دوی ورڅخه خپله لاره جلا نه کړي، نو باور دی چې له پاڼ او ګړنګه به ولوېږي.

همدارنګه دې ښاغلی مسعود او د ټلوالې نور قومي ټېکدار او سوداګر پر قوم، سمت او ژبې د بدرنګه سوداګرۍ څخه لاس واخلي، ځکه چې قومي ټېکداري خپل رنګ بایللی او باور مې نشي چې دغه سوداګري دې ښه مارکېټ او بازار ولري.