د پاکستان سیاست لکه افغانستان د ماشومانو په لاس کې نه دی

د پاکستان سیاست لکه افغانستان د ماشومانو په لاس کې نه دی. د پاکستان سیاست بالخصوص بهرنۍ پالیسي د پوځ د ای ایس ای په لاس کې ده. او د پاکستان پوځ د خپلو پلانو د عملي کولو لپاره ان د خپلو خلکو پواسطه انتخاب شوی ولسمشر (بوټو) او ان خپله د پوځ مشر (ضیالحق) وژلي. دا څه افغانستان نه دی چې د دولت زور په یو والي یا یو قومندان یا د پارلمان په غړو ونه رسیږي. پاکستان کې چې د پوځ حکم راشي نو نور خو پریږده چې اسفندیار او محمود خان به هم ورته ګډیږي. په پاکستان کې د پوځ خبره نه منل ځان او خپله کورنۍ وژل دي.
دا ځای دې نښه وي چې پاکستان به بیا داسې سیاست کوي چې هم به ځان خلاصوي. هم به له امریکا نوره مرسته اخلي او هم په به افغانستان باندې نور تورونه لګوي. پاکستان په کراتو کراتو دا کار کړی او بیا به یې وکړي او تر هغه به یې کوي تر څو چې زمونږ سیاستوال خپلې شخصي ګټې په ملي ګټو قربان نکړي او د احساساتي سیاست په ځای له عقلاني سیاست څخه کار وانخلي. زه پدې هم ویریږم چې پاکستان به یو ځل بیا د امریکا تر څنګ افغان دولت هم غلط کړي او دا ژمی به یې هم لکه د تیرو ۱۶ ژمیو په شان د سولې، امن، ورورولۍ، تجارت او نورو هوايي خبرو باندې غلط کړي.
که افغان دولت هوښیار وي باید پوه شي چې نور د پاکستاني دولت په خبرو اعتبار کول د حماقت هغه ټیټه درجه ده. یو لیونۍ هم چې ۱۶ کاله غلط شي په اوولسم کال نه غلطیږي. نه به په سوله کې درسره مرسته وکړي. نه په تجارت او بله برخه کې. د پاکستان د دولت هدف د افغانستان کمزوري کول او ځان ته احتیاج ساتل دي او په هر ډول چې کیږي دوی به دا کار کوي.

اجمل ستانکزی