اوس مې له ټول افغانستان ښه نه راځي او له افغانانو د وېرې احساس کومه.

زه څو ورځې وړاندې په ټرین (لیرګاډي) کې بل ښار ته په سفر روان وم، زما د ناستې څوکۍ ته مخامخ څوکۍ کې بله سویډنۍ د پاخه عمر ښځه ناسته وه، له ناستې سره سم مو خبرې شروع او بعضې پوښتنې تبادله کړې، زما او د هغې خبرې په نرمه لهجه روانې وې، ما څخه یې د خبرو په دوران کې پوښتنه وکړه چې اصلي د کوم ملک یې؟ ما ځان افغان معرفي او د وطن (افغانستان) یادونه وکړه، زما له ځواب سره سم یې اخلاق سل درجې بدل او تندی یې تریو راڅخه واړاؤه. زما زړه ته شک پیدا شو چې ستونزه څه او ولې د افغانستان د نوم په یادونه راڅخه خفه شوه، ما بیا ورو په ډېرې نرمۍ له هغې د اخلاقو او د غیرعادي حرکاتو پوښتنه وکړه، هغې بغیر لدې چې فکر پرې وکړي ډیره ډاډه او نیغ په نیغه راته ؤویل؛ زه ډیره بښنه غواړم چې داسې تاته وایم، خو د افغانانو د تیر کال په جرم چې اته نفره هلکانو په زوره پر یوې جینۍ همدلته سویډن کې جنسي تیری وکړ اوس مې له ټول افغانستان ښه نه راځي او له افغانانو د وېرې احساس کومه.
ما د هغې د خبرو په ځواب کې دا هلکان مطلق ایرانیان معرفي کړل او له یوې اوږدې تشریح ځنې وروسته مې پدې قانع کړه چې د افغانانو اصلي تصویر دا ډول ندی چې تاسره ذهن کې ده.
دا یوه ښځه وه او ناڅاپه ورسره مخامخ او د هغې ناسم فکر مې ور سم کړ، خو په مجموع کې د ټولو هغو خارجیانو نظر به څنګه او کوم ډول ورتبدیلؤو چې همدا د شرم خبر یې تیرکال په اخبارونو او تلویزیونونو کې د افغانانو په نوم تر سترګو شو؟
د ستونزې حل: هغو چې دا جرم کړی ؤ د افغانستان نه، بلکې د ایران ؤ، خو د اقامت اجازې (قبولي) اخیستلو لپاره یې ځانونه افغانان معرفي کړي ؤ او د جرم کولو څخه وروسته د ټولو افغانانو رنګه پرې بده شوه. یو هلک دا ډول جرم تیر کال جرمني کې هم ترسره کړی ؤ، هغه خبر هم د افغان په نوم خپور خو آخر ایرانی وخوت. په اروپایي ملکونو کې دا ډول ډېر نور ایرانیان هم شته. زه وایم؛ د دا ډول جرمونو په صورت کې د افغانستان خارجه وزارت مربوط افغان سفارتونه باید څیړنه وکړي او رسماً د اروپایي دولتونو څخه غوښتنه وکړي، چې فلانکی د فلانکي جرم خبر د افغان په نامه د تلویزیون په پردو او راډیو ګانو کې خپور شو، تاسو باید مونږ ته د مجرم د هویت په هکله معلومات راکړئ، آیه تاسو مطمئین یاست چې مجرم یا مجرمین افغانان ؤ او که هسې هوایي مو جرم د افغانانو په نوم خپور کړ؟
بل دا چې اروپا میشت افغان سفارتونو کې باید له فساد څخه پاک چارواکي په دندو وګمارل شي، ځکه دلته سفارتونو کې ایرانیانو ته د افغان هویت تثبیت خط له 500-1000 ډالرو بیه پلورل ورکول کیږي.

سرور ستانکزی