پاکستان پر دويم پلان کار پيل کړ

ځکه پاکستان پوهېږي چې ترهګر ورته د اکسېجن حيثيت لري او په کومه ورځ چې په سيمه کې ترهګري له منځه لاړه، په هماغه ورځ پاکستان هم نور ختم دی.
هغه بله ورځ ولسمشر غني طالبانو ته د سولې ښه غوښن وړانديز وکړ، طالبانو ته د سر و مال خونديتوب، د هغوی د اوسېدو له‌پاره ځای، د سياسي ګوند په توګه د دوی د بانډ پېژندل، بنديزونه ترې لېرې کول، د زندانيانو ازادول او ډېر نور داسې څه وو چې دغه وړانديز يې له تېرو وړانديزونو څخه ډېر متقاوت کړی و.

که څه هم له يوه اړخه دغسې وړانديز د حکومت په کمزوري تعبيرېږي چې ګواکې جګړې ته يې له وسه تېره ده او ځکه يې نو اوس طالبانو ته د دومره زياتو امتیازاتو وړانديز کړی دی، خو په ټوله کې دغه وړانديز د امريکا او چين په ګډون د نړۍ ډېری هېوادونو او بنسټونو وستايه.
دا ځل طالبان هم د تېر برعکس تر اوسه غلي دي او لا يې هم د دغه وړانديز په اړه د اقرار او انکار غږ نه دی پورته شوی.
يو قوي باور دا دی چې د طالبانو اوس هم زړه کېږي او هم يې ساړه، ځکه نو غلي دي او د تلې سر ته ګوري، خو دلته زموږ خبره د پاکستان پر دويم پلان ده.

که څه هم طالبان به د پاکستان په خوښه سوله کوي، يا که انکار کوي هم د پاکستان فرمايش به وي، خو ښکاري چې پاکستان وار له مخه پر دويم پلان کار پيل کړ.
دا هغه پلان دی چې موږ ټولو ورڅخه وېره درلوده.
پاکستان به طالبان په څو ډلو ووېشي، ځينې به يې سوله وکړي، امتيازات به تر لاسه کړي، خو بيا به هم هماغه طالبان پاتې وي، يوازې اوسي به په کابل کې.
دوی به د ځينو نورو کابل مېشتو طالبانو غوندې خوندور ژوند، موټر، کور او ساتونکي لري، مګر هره هڅه به يې د نظام په تاوان او د دښمن په ګټه وي.
بله ډله به يې هماغسې جګړې ته دوام ورکړي او د پاکستان ارمانونه به په سيمه کې پالي.

دا وړمه شپه د جلال‌اباد په څو ولسواليو کې د ملا منصور د پلويو طالبانو يوې ډلې خپل موجوديت اعلان کړی او شپې پاڼې يې خپرې کړې دي.
دوی د طالبانو رهبري کمزورې بللې او هغو طالبانو ته يې اعلان کړی چې له دوی سره يو ځای او په اړيکه کې شي چې د طالبانو له اوسنۍ رهبري يې زړه تور دی.
پاکستان به دغسې بېلابېلې نورې ډلې هم جوړې کړي. بېلابېل نومونه به ورباندې کښېږدي، خو کار به د ټولو يو وي، هغه دا چې په سيمه کې اور سړېدو ته پرې نه ږدي.
حکومت که په دغو حساسو شرايطو کې شمېرلي او په تول پوره ګامونه پورته نه کړي، وينه به همداسې بهېږي او امتيازات به له لاسه وتلي وي.

سرخط ورځپاڼه