استرالیا د کرکټ د شپږم ځل قهرمانۍ په هڅو کې

اسټرالیا چې له انګلستان سره د کرکټ په غوړېدا او پرمختګ کې پوره ، پوره مرسته کوی آن په ښوونځیو کې د کرکټ مضمون لری، چې د ښوونځیو له دورې څخه زده کوونکی په کرکټ بوخت وی او کله چې زده کوونکی د فراغت مرحلې ته رسېږی، د زده کړو تر څنګ د کرکټ په برخه کې هم پوره مسلکی او ماهره وی.

همدا علت دی چې د نړۍ په کچه خورا خطرناک لوبغاړی د نورو هېوادونو ترڅنګ په اسټرالیا کې زیات موندل کېږی.

لومړی راځو دېته چې اسټرالیا په ۲۰۰۳ م کال نړیوال پنځوس اوریز جام کې څه وکړل، چې یو ځل بیا غواړی په ۲۰۱۹ م کال نړیوال جام کې هم همداسې لوبه وکړی، ترڅو د شپږم ځل لپاره د نړیوال پنځوس اوریزجام اتلولی یوسی.

۲۰۰۳ م کال نړیوال جام او کوربانه هېوادونه
۲۰۰۳ م کال نړیوال پنځوس اوریز جام د کرکټ نړیوالې شورا اتم پړاو جام و، د دغه جام لوبې د افریقا په براعظم کې په درې هېوادونوکې ترسره شوې.
افریقا، زِمبابوې او کینیا درې هېوادونه د ۲۰۰۳ م کال نړیوال جام کوربانه وو.
دا نړیوال جام په ۱۵ لوبغالو کې ترسره شو، چې پکې ۱۲ سهیلی افریقا کې وو، دوه په زِمبابوې کې وو او یو لوبغالی بیا د کینیا په پلازمېنه نایروبی کې و.
دا لومړی ځل و چې د افریقا په لویه وچه یا قاره کې نړیوال پنځوس اوریز جام ترسره شو.
نمېبیا د لومړی ځل لپاره په دغه نړیوال جام کې ورشامله شوې وه.

د ۲۰۰۳ م کال نړیوال جام لومړنی ټورنمنټ و، چې ۱۴ لوبډلې پکې ولوبېدې.
نړیوال پنځوس اوریز جام په هرو څلورو کلونو کې د کرکټ نړیوالې شورا له خوا دایرېږی، له دې وړاندې دغه جام ته د غوراوی جام سیالۍ تر سره کېږی، چې بیا ترې د غوراوی جام مخکښې لوبډلې نړیوال جام ته لاره مومی.

په ۲۰۰۳ م کال ورلډ کپ کې لوبډلې په ۲ ګروپونو وېشل شوې وې، چې اووه لوبډلې الف یا ای ګروپ کې او ۷ لوبډلې په ب یا بی ګروپ کې ولوبېدې.

د هر ګروپ له اووه، لوبډلو درې، درې لوبډلو یې دوهم پړاو یا سوپر شپږ پړاو ته لاره موندله.

په ۲۰۰۳ م کال نړیوال پنځوس اوریز جام کې په الف ګروپ کې اسټرالیا، هندوستان، انګلستان، پاکستان، زِمبابوې، نېدرلېنډ او نمېبیا شاملې لوبډلې وې.

د الف ګروپ له ۷ لوبډلو څخه درې لوبډلو اسټرالیا، هندوستان او زِمبابوې سوپر سېکس یا شپږ غوره پړاو ته لار وموندله، انګلستان، پاکستان، نېدرلېنډ او نمېبیا له سیالیو بهرشول.

په بی ګروپ کې سریلانکا، نیوزیلېنډ، سهیلی افریقا، ویسټ انډیز، کینیا، کاناډا او بنګله دېش شامل وو.

سریلانکا، کینیا او نیوزیلېنډ د شپږ غوره لوبډلو پړاو ته لار وموندله.

بنګله دېش، کاناډا، ویسټ انډیز او سهیلی افریقا له سیالیو بهرشول.

دا مهال د افغان لوبډلې نوم او نښان نه و؛ هغه مهال چې کینیا او نمېبیا په نړیوال جام کې لوبېدل نن سبا یې نوم او نښان ورک دی او پر ځای یې افغان پیاوړې لوبډله په نړیوال جام کې د هېوادوالو له نندارې او تودو چکچکو سره مخ کېږی.

شپږ غوره لوبډلو پړاو او لوبډلې یې
د سوپر سېکس پړاو لوبډلو څخه اسټرلیا، کینیا، هندوستان او سریلانکا لوبډلې نیمه پایلوبو ته ولاړې، زِمبابوې او نیوزیلېنډ په شپږ غوره لوبډلو په پړاو کې له سیالیو بهرشوې.

کینیا تر سیمی فاینل یا نیمه پایلوبو پورې ولاړه، چې دې چارې د کرکټ نړۍ خورا حېرانه کړه.

په لومړۍ نیمه پایلوبه کې اسټرالیا، سریلانکا ته په ۴۸ منډو ماته ورکړه، سریلانکایی لوبډله له سیالیو بهر شوه او اسټرالیایی لوبډله سیده پایلوبې ته ورسېده.
او دوهمه نیمه پایلوبه کې هندوستان په نړیوال جام پایلوبه کې د کینیا د خوبونو تعبیرته د پای ټکی کېښود او په ۹۱ منډو هندوستان کینیا ته ماته ورکړه، کینیا له سیالیو بهر شوه او هندۍ لوبډله اسټرالیا پسې پایلوبې ته ور ورسېده.

په پایلوبه کې اسټرالیا، هندوستان ته په ۱۲۵ منډو ماته ورکړه او په دې ډول اسټرالیا د ۲۰۰۳ م کال نړیوال پنځوس اوریز جام اتلولی واخېسته.

دا دریم ځل اتلولی وه، چې اسټرالیا وګټله.

په پایلوبه کې ریکی پونټېنګ ۱۴۰ ناسوځېدلې منډې وکړې او دا څلورم لوبغاړی و، چې د نړیوال جام په پایلوبه کې یې سلیزه ووهله.

اسټرالیا او نړیوالو جامونو اتلولۍ
اسټرالیا ۱۹۸۷ ، ۱۹۹۹ ، ۲۰۰۳، ۲۰۰۷ او ۲۰۱۵ م کلونوکې د نړیوالو پنځوسو اوریزو جامونو اتلولۍ ګټلی دی او سږ کال یې اراده کړې، چې یو ځل بیا دغه اتلولی وګټی.
اسټرالیا سږ کال له خپلې اتلوۍ دفاع کوی.