طالبان دې د فتحې خوبونه نه ویني/ اېمل پیاوړی

طالبان دې حقایق  درک کړي، په خپلو کړنو دې له سره غور وکړي او دا دې هم وارزوي چې په تېرو اتلسو کالو کې یې مسلسل جنګ وکړ، خپل ځانونه او عام افغانان یې څومره بدمرغه کړل؟ دوی تراوسه کومه لاسته راوړنه لري او د څومره افغانانو خواخوږي او ملاتړ له دوی سره دی؟

طالبانو چې پرون هم جنګ پیل کړی و، نو هیڅ دیني جنبه او اړخ یې نه درلود او نن هم چې جنګ کوي د اسلامي نړۍ ټولو علماو واضح فتواوې ورکړې چې دا یو نامشروع جنګ، وروروژنه او افغان وژنه ده چې په اسلام کې نه یوازې کومه توجیه ورته لټول کېدلی شي، بلکې دا جنګ مطلق حرام دی.  

طالبان د پاکستان او نورو له لوري تېرېستل شوي دي او هغوی یې د خپلو شومو موخو لپاره کاروي. دوی یې یا مجبوره کړي دي او یا یې غلط کړي دي چې باید جنګ ته ادامه ورکړي، کنه په دې وروستیو کې چې له طالبانو څخه د جنګ مشروعیت واخیستل شو، خصوصاً د کوچني اختر له اوربند وروسته د ډېرو طالبانو ذهنونه روښانه شوي او هغوی له جنګي طالبانو څخه خپلې لارې بېلې کړې دي، مګر ځینې چې لا هم د پاکستان له لوري مجبور او برمته شوي دي او یا بې ځایه غرور نیولي دي لا هم په جنګ ټینګار کوي.

طالبانو ته د ځینو له لوري د فتحې د دروغو روحیه ورکول کېږي او دوی فکر کوي چې رښتیا به هم بریالي شي او د جنګ له لارې به واک ته ورسېږي، دا خوب یې ځکه خیالي او بې مانا دی چې افغانستان اوس پیاوړي امنیتي او دفاعي ځواکونه لري چې هره ورځ او هره شیبه د دښمن پر وړاندې په سنګرونو کې جنګېږي. د دوی په موجودیت کې به طالبان نه یوازې د فتحې خوب رښتیا شي، بلکې طالبان چې هر چېرې پیدا کړي، نو د خپلو بدرنګو اعمالو په سزا به یې ورسوي.

طالبانو ته ښایي چې د فتحې خوبونه له ذهنه وباسي، هم پر ځان رحم وکړي او هم پرعامو افغانانو. دوی لا هم فرصت لري چې خپل عادي او سوله ییز ژوند ته ستانه شي. د سولې لاره اختیار کړي. بین الافغاني مذاکراتو ته ترجیح ورکړي خپل ټول مسایل د مذاکراتو له لارې حل او فصل کړي، ځکه جنګ نه د ستونزو د حل لاره ده او نه هم ګټونکی او بایلونکی لري. جنګ تباهي او بربادي ده، جنګ د ټولو په زیان دی او زموږ هیوادوال نور د جنګ د زغم وس او توان ځکه نه لري، چې پوره څلور لسیزې یې دغه بدمرغه جنګ او د هغه زیانونه وزغمل.

افغانستان اوس د طالبانو د وخت افغانستان نه دی چې په نړیوالو کچه منزوي و او یوازې له پاکستان سره یې اړیکې وې. پاکستان ته احتیاج او محتاج و. افغانستان اوس له ټولې نړۍ سره اړیکې لري. نظام او حکومت لري. اساسي قانون لري، امنیتي او دفاعي ځواکونه لري، مګر لا هم د جنګ له امله د خلکو ژوند تریخ دی. لا هم د طالب د وېرې او وحشت له امله خلک نارامه دي. مګر که سوله وشوه، نو د وطن د پرمختګ زمینې به زیاتې او د خلکو د ژوند خوښۍ او رنګینۍ به هم پرېمانه شي.