ولس دې د اصلاحاتو ملاتړ وکړي/ محمدبشیر یوسفزوی

اصلاحات د حکومت مهم لومړیتوب او د ولس اساسي غوښتنه ده، ځکه چې له یوې خوا شته فساد او بې کفایتي د ولس او دولت ترمنځ د واټن د رامنځته کېدو لامل شوې، له بل لوري فساد هم د دولت او هم د ملت پر وړاندې لوی ننګونه ده، ځکه د همدغه فساد په پایله کې مافیایي او مفسدې کړۍ ورځ تر بلې چاغېږي. د دوی چاغښت هم ملت او ملي ګټو او هم دولت او اصلاحاتو ته لوی تهدید دی.

ولسمشر غني د خپل حکومت له لومړیو څخه د فساد ضد مبارزې غږ پورته کړ، خو دا چې له یوې خوا په تېرو دیارلسو کې پراخ فساد شوی او له بل لوري ادارې په کافي توګه کاواکه او فاسدې شوې وې، نو له همدې امله لا هم د نوموړي هڅو او برنامو پام وړ پایلې نه دي لرلې.

د دې ترڅنګ د فساد د مخنیوي او د اصلاحاتو بهیر د موثریت او چټکوالي لپاره د ولسمشر غني د اصلاحاتي برنامې ټینګ ولسي ملاتړ ته اړتیا ده، ځکه چې په تېرو څلور نیمو کالو کې موږ ولیدل چې کله هم حکومت د کوم مفسد او زورواکي په توګه اقدام کړی دی، نو هغوی مسایلو ته قومي رنګ ورکوی او د ځان ژغورنې لپاره یې عام خلکو واټونو او لاریونونو ته را اېستلې دي او حکومت له ولس سره د ټکر د رامنځته کېدو د مخنیوي لپاره نرمښت ښودلی دی، مګر دا نرمښت د معافیت په معنی نه دی.

ولس ته ښایي له هوښیاري کار واخلي، د مفسدو، زورواکو او غیر مسوولو وسله والو پرځای په غوڅ اکثریت د دولت ترڅنګ ودرېږي. دوی ته ښایي چې د فساد او زورواکۍ له قومي کولو څخه ډډه وکړي، ځکه همدا مفسدین او زورواکي د ټولنې د امنیت، ثبات، پرمختګ او د قانون د حاکمیت پر وړانډې لوی تهدید دی.

په دې کې شک نشته چې  ولس اصلاحات غواړي، د اصلاحاتو ملاتړي دي، خو په دې برخه کې د دوی عملي اقدام، هڅې او تحرک پکار دی. تر څو چې مفسدین او زورواکي خپل ځانونه منزوي حس نه کړي، نو دوی به د حکومت له لوري د اصلاحاتو پیل شوی بهیر له خنډ سره مخ کړي او پر وړانډې به یې له مقاومت څخه لاس وانخلي، مګر په دغه مقاومت کې دې ولس ځان نه ورګډوي، بلکې دوی دې د اصلاحاتو او دولت ترڅنګ ودرېږي، تر څو د قانون حاکمیت او د ټولنیز عدالت تامین ته لاره هواره شي.

تر هغو چې مفسدین، مافیا، زورواکي او غیر مسوول وسله وال د قانون او د قوې د مشروع استعمال له لارې مهار او اصلاح نشي، نو اصلاحات بې مانا دي او څومره چې ولس له هغوی څخه ځان لیرې کړي او د اصلاحاتو بهیر عملي ملاتړ وکړي، نو همغومره به اصلاحات، موثر او چټک شي.

اصلاحات په خپله د ولس په ګټه دي، ځکه دوی ته خدمات او اسانتیاوې زیاتېږي. د دوی لپاره ځانګړې شوې منابع پر وخت او موثرې لګول کېږي. د دوی کارونو او ستونزو ته رسیدګي کېږي. غږ یې اورېدل کېږي. حقونه یې تامینېږي او هیڅوک هم د دوی په حق کې ظلم او غفلت نشي کولی.