نړۍ زموږ د امنیتي او دفاعي ځواکونو منندویه ده

محمدروښان ښاد-

له کومې ورځې چې نړیوال سوله ساتي ځواکونه له افغانستان څخه وتلي، نو له همغې ورځې د جنګ مسوولیت هم افغان امنیتي او دفاعي ځواکونو ته ور لېږدېدلی دی. هغو ځواکونو ته چې په لومړیو کې اټکل دا وو چې دوی به د نړیوالو ځواکونو ځای ډک نشي کړای او نه به هم د جنګ له عهدې څخه ووتلی، مګر زموږ اتلو او زړورو سرتېرو په ډېره مېړانه ټولو ته ثابته کړه، چې دوی د خپل وطن اصلي مدافعین او ساتندویان دي او په خپلو سرښندنو یې د نورو وړاندوینې او اټکلونه غلط ثابت کړل.

افغان امنیتي او دفاعي ځواکونه یوازې د افغانستان نه، بلکې د سیمې او نړۍ د امنیت او ثبات لپاره جنګېږي او ښه په قوت او جرئت جنګېږي او له همدې امله د نړیوالو پام ور اوښتی دی.

په ۲۰۱۴ کال کې چې نړیوال سوله ساتي ځواکونه په افغانستان کې نهیلي شوي وو، نو له وتلو وروسته یې خپل ټول امید له لاسه ورکړی وو او دوی په دې باور وو چې طالبان او ترهګرې ډلې به بریالۍ کېږي او افغان حکومت ته به سقوط ورکوي، مګر زموږ د اتلو او زړورو ځواکونو د قربانیو له برکته نه یوازې چې نظام سقوط نشو، بلکې برعکس طالبان او ترهګرې وسله والې او جنګي ډلې وځپل شوې او لا یې هم پر وړاندې جدي عملیات جریان لري.

په سختو جنګي حالاتو کې ګڼو ځوانانو چې زیاته پانګونه پرې شوې وه، هېواد پرېښود، مګر زموږ امنیتي او دفاعي ځواکونه په ټول قوت د ملي انګېزې له مخې په پیاوړې روحیه د دښمن پر وړاندې ودرېدل او وجنګېدل، نو له همدې امله زموږ دغو اتلو او مېړنیو ځواکونو نه یوازې زموږ د ولسمشر او هېوادوالو پام ور اړولی بلکې د نړیوالو د پام او باور وړ هم ګرځېدلې دي.

د افغانستان امنیتي او دفاعي ځواکونو ته د ولسمشر غني زیاتې پاملرنې د هېواد په داخل او بهر کې ډېر مثبت اغېز لرلی، ځکه چې هم په کور دننه بېلابېلو ولایتونو، ولسونو او اقشارو د خپلو امنیتي او دفاعي ځواکونو بشپړ ملاتړ اعلان کړ او هم د نړۍ د بېلابېلو هېوادونوپام زموږ امنیتي او دفاعي ځواکونو ته ور واوښت، ځکه بهرنیو نظامي کارپوهانو او رسنیو وخت پر وخت په خپلو ویناو، شننو او خپرونو کې د افغانستان د امنیتي او دفاعي ځواکونو د وړتیا او زړورتیا یادونه او ستاینه وکړه.

زموږ د اتلو ځواکونو د مېړانې له برکته نړۍ یو ځل بیا له افغانستان سره خپلې ژمنې تازه کړې او د امنیتي او دفاعي ځواکونو د تمویل او تجهیز په برخه کې یې مرستې وکړې. هند او امریکا د افغانستان له امنیتي او دفاعي ځواکونو سره د هلیکوپترو او جنګي طیارو مرسته وکړه او دغه همکاري به همداسې دوامداره وي.

د دې ترڅنګ روسیې هم لس زره کلاشینکوفونه د افغانستان د امنیتي او دفاعي ځواکونو د پیاوړتیا او تجیهز په موخه د افغانستان حکومت ته ورکړې او هند هم اعلان وکړ، چې که د افغانستان حکومت له هند څخه د هر ډول او هرڅومره وسلې غوښتنه وکړي، نو هند به ورته مثبت ځواب ورکړي.