بالاخره پاکستان هم د ولسمشر غني د برنامو ارزښت درک کړ

 محمدبشیر یوسفزوی

افغانان په عجله او بیړه کې هم بې جوړې دي، هغه کیسه به مو خامخا اورېدلي چې وایي، له یوې خوا د کوچي کډه بارېدله او له بلې خوا یې بیا بیا ملا ته ویل چې ملاصاحب زوی مې را ملا کړه، نو موږ په هر کار کې همداسې په عجله یوو. سره له دې چې دا متل هم لرو چې وایي عجله د شیطان کار دی.

دا مې تر دې پورې وویلې په لومړیو کې چې ولسمشر غني واک ته ورسېد، نو څو میاشتې وروسته ټولو په دې ښکنځه چې ولې یې خپلې ژمنې پوره نه کړې او ولې یې کوم تحول رانه وست؟ مګر ولسمشر غني به همغه مهال ویل چې زما د کارونو اغېزو او پایلو ته باید حداقل څو کاله صبر وکړئ، ځکه زه په لنډمهالو پروژو او پلانونو کار نه کوم زه داسې زیربنایي او اساسي کارونه غواړم ترسره کړم چې حداقل راتلونکي سل کاله د خلکو ژوند تضمین کړي او د دې پلانونو تطبیق به معلومدار زیات وخت واخلي او هم به یې اغېزې ژر محسوس نشي، نو د دې لپاره ستراتیژيکې حوصلې ته اړتیا ده.

ولسمشر غني همداسې وکړل، د افغانستان لپاره یې د ترانزیت لپاره اساسي کارونه پیل کړل، نوې لارې، بندرونه او دهلېزونه یې پرانیستل چې کرار کرار یې ولس اغېز او ښېګڼه ولیده او د دوی زړونو ته دا ولوېده چې ولسمشر غني د نورو غوندې په لنډمهالو او نمایشي کارونو او پروژو وخت نه ضایع کوي هغه غواړي د دې وطن لپاره اساسي کار ترسره کړي.

د ولسمشر غني د پلانونو، اقتصاد محوره فکر او سمیه ییز اتصال  لیدلوري ارزښت حتی پاکستان هم درک کړی دی، ځکه تېره اونۍ چې د پاکستان لومړي وزیر له ولسمشر غني سره ټلیفوني خبرې کولې، نو د ده پلانونه یې وستایل، د هغو هرکلی یې وکړ او په هغه اړه د لا زیات بحث لپاره یې ولسمشر ته رسمي بلنه ورکړه چې پاکستان ته سفر وکړي. پاکستان چې دا مهال له اقتصادي کړکېچ څخه خورېږي او په بدوضعیت کې قرار لري، نو له دې امله غواړي چې د افغانستان له لارې هم منځنۍ اسیا ته ځان ورسوي او خپلې ګټې بېرته تامین کړي او هم له افغانستان سره خپله سوداګري همغې پخوانۍ کچې ته زیاته کړي.

ولسمشر غني به تل ویل چې د ده برنامې نه یوازې د افغانستان، بلکې د سیمې د هیوادونو اقتصادي ودې، سوداګرۍ، انکشاف او ثبات لپاره ګټورې دي. ولسمشرغني د خپلو همدغو برنامو له برکته د اقتصادي همکاریو د زیاتولو له پلوه په سیمه په ځانګړي ډول منځنۍ اسیا کې وضعیت ته مثبت بدلون ورکړ او دا مهال د ترانزیت، سوداګرۍ او اقتصادي همکاریو په برخه کې افغانستان له زیاتو هیوادونو سره داسې تفاهم لیکونه لاسلیک کړي دي چې دوه اړخیز او ان څو اړخیزې ګټې او مفادات لري او پاکستان چې اوس یې د دغو برنامو ارزښت درک کړی دی غواړي چې له بد اقتصادي وضعیت څخه د وتلو لپاره له دغو برنامو او د هغو له ښېګڼو څخه مستفید شي، مګر دا به د پاکستان په صداقت پورې اړه لري، ځکه پاکستان باید د دې لپاره افراطیت او ترهګري ته شا کړي.