د سوناکشي بل فلم را روان دی

د هندي سېنما وتلې او نوموتې ستورې سوناکشي سنها چې په دې وروستیو کې یې تثمیل ته ډېر خلک ګوته په غاښ دي، د «کورني روغتون» په نوم نوی فلم را روان دی.
سوناکشي وايي، راتلونکی فلم یې د جنسي مسایلو د ستونزو په اړه خبرې کوي او د فلم له جوړولو یې موخه دا ده چې عام خلک په ازاد ډول د جنسي مسایلو په اړه خپلې ستونزې شریکې کړي.
د بالیووډ دا مشهوره ممثله په دې اند ده چې سکس یا جنسي اړیکې د ژوند اساسي برخه ده او په دې برخه ستونزې عامې دي؛ نو د ستونزو شریکول یې هم باید عادي خبره وي.
هغې له رسنیو سره په خبرو کې زیاته کړې، سکس یو مهم او عام مضمون دی او په اړه یې بحث اړین دی. هغې له له ټولو ښځینه‌وو او نارینه‌وو غوښتنه کړې چې د جنسي مسایلو په اړه له بحث کولو و نه شرمېږي.
سوناکشي زیاتي، تمه لرم چې د «کورني روغتون» فلم به خلک وهڅوي چې د جنسي مسایلو په اړه په ازاد ډول وغږېږي او ډاډ یې څرګند کړی چې دا فلم به خلک په فکر کولو او خبرو کولو مجبور کړي.
سوناکشي وايي، کله چې د فلم په اړه ورته وویل شول؛ لومړی حیرانه شوه چې ولې باید په دې فلم کې ولوبېږي، خو کله يې چې پوره کیسه واورېده؛ نو غوره یې وګڼله چې په دې اړینه موضوع فلم جوړ کړي.
په دې فلم کې سوناکشي د خپل تره په روغتون د جنسي ناروغیو د معالجې په توګه کار کوي او د تره له مرګ وروسته د شفاخانې مشري تر غاړې کېږي او تمه ده چې دا فلم د را روانې اګسټ میاشتې په ۲یمه ریلیز شي.