د ”زرګونه جنایات” په نوم کتاب چاپ شو

دا کتاب نن د حکومت د اطلاعاتو او رسنیو مرکز کې د ملي امنیت شورا د دفتر ویاند کبیر حقمل او یو شمېر مسوولینو لخوا رسنیو ته وښودل شو.
د زرګونه جنایات کتاب په لومړي جلد کې شاوخوا د قومي مشراو ښوونکو دوه زره هغه پېښه ذکر شوي دي چې طالبانو په یوه او بل نوم وژلي او ترور کړي دي.
د ملي امنیت شورا دفتر ویاند کبیر حقمل د یوې خبري ناستې پر مهال وویل، له دغه کار یې هدف نړیوالو سازمانونو ته د طالبانو د جنایتونو را برسېره کول دي.
د حقمل په وینا، طالبانو ځکه دغه کادرونه او قومي مشران په نښه کړي دي او وژلي يې دي چې دوی د دې ملت پرمختګ او یووالی تضمیناوه.
کتاب کې لیکل شوي، چې طالبانو دغه کار په شعوري ډول د پردیو استخباراتو په لمسون ترسره کړی دی او دغه لړۍ لا هم په شعوري ډول روانه ده.
لیکل شوي کتاب د قومي مشرانو تر څنګ، د ډاکټرانو، انجنیرانو، ښوونکو او ورته نور موارد یاد شوي دي چې طالبانو له تېرو اتلسو کلونو راهېسې د هغوی قتل عام روان کړی دی.
کتاب کې لیکل شوي چې طالبانو یوازې په انسانانو نه ده، بلکې د افغانستان په پرمختګ برید کړی دی او دغه بریدونه اوس هم روان دي.
د کتاب معرفۍ مراسمو کې د ملي امنیت شورا دفتر له ټولو نړیوالو ادارو غوشتي چې د طالبانو د دغه جنایتونو پر وړاندې غږ پورته کړي، هغه جنایتونه چې تېرو اتلسو کلونو کې شوي دي.
همدا راز پر نړیوالو ادارو غږ شوی دی چې ددې پېښو عاملین باید مجازات شي، ځکه انساني ناورین ته يې زمینه برابره کړې ده.
ملي امنیت شورا دفتر ویاند وویل، دا د طالبانو جنایتونو یوه کوچنۍ برخه ده او راتلونکي کې به ورته نور جنایتونه هم له رسنیو او نړیوالو ادارو سره شریک کړي.
په دې تړاو یو ویبپاڼه هم جوړه شوې ده، ویپاڼه کې د جنایتونو اړوند یو فورم شته دی چې هر څوک کولای شي خپلو سیمو کې د ترسره شویو جنایتونو د رابرسېره کېدو لپاره هغه ډک او د کتاب په بڼه به چاپ شي.