د افغاني جګړې ناولی روح او د سولې څرکونه

افغاني ټولنه له کلونو راهسي له کړاونو او ستونزو څخه ډکې شپې تېروي، علتونه ډېردي، خو په مجموعي توګه ویلی شو، چې د اوسنيو نږدې څلورو، پېنځه لسیزو د پردۍ جګړې له وجې زموږ د ټولنې روح  دومره ناولی شوی او له فساده ډک دی، چې د ورور مرګ کې جنت، د وطن ورانولو کې ازادي، د مکتب  سوزولو کې  د کفر له منځه وړل، د علم او  فرهنګ  ډېوو  بربادولو  کې د روڼ سهار خوبونه وینو.

موږ د حالاتو د جبر او د خپلې ناپوهۍ له وجې دومره پردي شوی او له عقدې ډک شوی یو، چې خپل ورور دوښمن، خو؛دوښمنان دوستان او وروڼه بولو.

اوس موږ لره څه په کار دي، چې د لسیزو ناورین ته د پای ټکی کیږدو، او د یوې سوکاله او پرامنه ټولنې او پرمختګ څخه برخمن شو؟

ځواب روښان دی، موږ لره د ټولنې د روح د پاک کولو  لپاره  دومدار  کار(سولې) او ریاضت ته اړتیا ده،تر هغې چې په خپل ورور دا ومنو، چې زړګیه؛ زموږ دوښمنان نه؛ بلکې د یوې ادې زامن او  وروڼه یو ،دا جګړه ناولي او د  پردیو د شومو  افکارو زیږنده ده، مور (وطن) پر موږ  د ابادۍ او سمسورتیا حق لري، تر څو به یې د پردیو په لمسون ژړوو او  ورانوو، او نور به  څومره د ګلونو  وروڼو جنازو ته اوږې ورکوو، هدېرې خو مو نوره تر کلیو او بانډو راورسیدې.

تاسې پوهیږئ، چې نوره نړۍ هر دقیقه  د یوه پرمختللي تحول  په حالت کې ده، او موږ هره قیقه د ورور ټټر ته ګوته په ماشه ناست یو!!!

نو اوس ورورسته له ښه ډېرو کلونو د سولې څرک او  یو فرصت لاس ته راغلی دی، موږ باید له دغه چانس څخه ګټه واخلو، او نوره د پردیو ککریو کې  د  جوړ شویو  وحشتونو ته د پای ټکی کیږدو او خپل ورور غیږ کې ونیسو او د خپلې ټولنې روح  له دې ناولي  فساده (پردۍ جګړې) څخه پاک او ستره کړو، او د خپل ورر سره یو ځای د وطن سولې او ابادۍ ته مټې راونغاړو ، کاروکړو، او د خپلې زحمکتشۍ  له برکته افغان وطن او ګران ورورک سیال او بریال  کړو .