اڅکزی: له پاکستانه د کینسر ناروغ جوړ شوې؛ ورځ تر بلې کمزوری کیږي

د پښتونخوا ملي عوامي ګوند مشر محمود خان اڅکزی وايي، دې ورستیو کې د پاکستاني حکومت بې کاره سیاست دا هېواد له سیاسي انزوا سربېره له اقتصادي بحران سره مخ کړې چې ورځ تر بلې یې حالت مخ په خرابېدو دی.
هغه تېره ورځ د پاکستان جمهوري تحریک غونډې ته په وینا کې وویل چې د پاکستاني حکومت بې کاره سیاست له دې هېواد څخه د کنسر ناروغ جوړ کړی او ورځ تر بلې د کمزوري کېدو په حالت کې دی. نوموړي دغه راز په خپلو خبرو کې ټېنګار وکړ چې د پاکستان جاسوسي ادارې دې نور له سیاست څخه لاس واخلي کنه په خبره یې دا هېواد به ډېر ژر له یو ستر او نه جوړیدونکي بحران سره مخ شي. هغه وویل: «که چېرې د پاکستاني حکومت جاسوسي ادارې سیاست کول غواړي نو بیا دې وردۍ وباسي او په ډاګه دې د سیاست ډګر ته راشي.» یاده غونډه کې د محمود خان اڅکزي سربېره په پاکستان کې د جمهوري تحریک ګونډ نورو غړیو او مشرانو هم ګډون او ویناوی وکړی.
دا په داسې حال کې ده چې پاکستان کې د جمهوري تحریک ګوند غواړي څو عمران خان له خپلې دندې ژر تر ژره استعفا وکړي او دې هېواد کې دې له سره انتخابات ترسره شي چې په خبره یې د پوځ او جاسوسي ادارو هېڅ ډول رول پکې نه وي.