د قدر شپه، میاشت د روژې ده
جانانه خدای ته دعا کړه، دعا به کړمه
باب ریان به ورته نیسم
له روژتي جانان به غېږه ګرځومه
روژه د خدای میاشت ده مومنه
خدای د مومن اجر پخپله ورکوینه
روژه د صبر خدای ته نیسم
زه د غمونو په انګار شپې تېرومه
روژه د صبر مې نیولې
د ورک جانان په ملاقات افطار کومه
لاسونه پورته کړئ، دعا کړئ
خدای دې زموږ روژه قبوله کړي مینه
روژه د خدای ده په خدای ګرانه
خدای خو پخپله روژتی خوشحالوینه
روژه د خدای لپاره نیسم
په روژه ماتي دعا تا لره کومه
روژه د خدای میاشت ده مومنه
خدای د مومن اجر پخپله ورکوینه
روژه د سولې علامه ده
جنګ او جګړه دې په نړۍ نه وي مینه
روژه د صبر مې اوږده شوه
میاشتې شوې تېرې اوس یې شمېرمه کلونه
روژه د صبر ورته نیسم
د یار دیدن ته د عمرونو تږی یمه
روژه د صبر، صبر میاشت ده
د صابرانو اجر خدای پاک ورکوینه
روژه د صبر د باغ ونه
د صبر ونه په ثمر رسي مینه
روژه د کور کلي مزه کا
په پردي ښار کې څه روژه څه ماښامونه
روژه راغلې مېلمنه ده
د مېلمنې ځای د لېمو په څوکو مینه
روژه رحمت د ذوالجلال ده
په روژتیانو ذوالجلال رحم کوینه
روژې زما شفاعت وکړه
په جنتي مینه جوړه درسره ځمه
روژه زما زه د روژې یم
که په جنت مې خرڅوي ورسره ځمه
روژه که هر څومره اوږده وي
آخر ماښام شي په خوښۍ یې ماتوونه
روژه کې خلک صدقه کړي
تا د دیدن صدقه و نه کړه مینه
روژه کې دوې خوښۍ دي ګله
یو روژه ماتی، بل د لوی خدای دیدنونه
روژه کې زموږ په ماښام راشه
د سرکو شونډو روژه ماتی درکومه
روژه کې مه راته غږېږه
زه مې روژه د خدای په ذکر تېرومه
روژه کې هر یو سوال قبلېږي
زه به الله ته ستا د مینې سوال کومه
روژه له یاره سره خوند کړي
د پردېسۍ روژه بې خونده وي مینه
روژه منو حکم د خدای دی
خو د ظالمو خلکو نه منو امرونه
روژه مومن امت ته راغله
له هر جومات د عبادت آواز راځینه
روژه یې تېره په خدمت شي
د ویاړ مېرمنې روژه ماتی پخوینه
روژه، بوزه ورته یو شان وي
خوار خلک خوار دي همېشه یې روژه وینه
روژې په ستړي امت راشه
سخت ګنهګار دی، لږ نجات ورکړه مینه
روژې ته ځکه خوشحالېږم
چې مرور آشنا به ووینم مینه
روژې ته ډېر خلک خوشحال وي
په زړګي خوښ وي وایې کله به راځینه
روژې ته شاته شاته ګورم
لکه بایللی جوارګر چې کور ته ځینه
روژې خبره یې که نه یې
زه د ریان په دروازه ولاړه یمه
روژې د تا له برکته
خدای شیطانان په ځنځیرو تړلي دینه
روژې د خدای روی مې دروړی
زما په تږي یار به نه کوې ظلمونه
روژې لږ رحم خو پرې وکړه
په خېټور جانان آسانه شه مینه
مهم ټکی: روژه د پښتو ادب په منځپانګه کې ډېر لوړ مقام لري ځکه چې د پښتون ټبر لوی اکثریت وګړي د اسلام د سپېڅلي دین پيروان دي. د روژې کلمه په پښتو لنډیو، شعري او نثري کلام کې په مختلفو ماناوو کارول شوې چې د دې عظیم عبادت اهمیت څرګندوي او پښتو ادب ته یې ګڼ شمېر لفظي او معنوي ښکلاوې بښلې دي.
د (روژه والې لنډۍ) د سلسلې دولسمه برخه به ژر خپره شي، له موږ سره اوسئ…
***************************************
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.