لومړی مننه او کورودانی/ اسدالله ښالیز

تېره ورځ مو له والي صيب سره ناسته درلوده، د امنيت په بې خوندۍ مو خبرې وکړې، نن خبر شوم چې د موټرو ښيښې درګرده سپينېږي، دوه کسيزه سپرلۍ نه پرېږدي او بې پليټه څو موټرې يې نيولې دي.
سپيناوی.
د همدې غونډې نيولو په تور کوم باتور په مستعار نامه سپکې سپورې راپسې کړي او چاپلوس يې بللی يم.
د پټ مخ تورپاليو!! د حيا او ابرو دنده لرم او دې ته نه يم اړ شوی چې د چوکۍ لپاره دې د چا درګاه وټکوم. ( اشتهار يې مه ګڼئ، د ملګرو برکات دي، له مرکزه راته تر دې دمه درې وړانديزونه شوي خو پخپله لمن د داغ اېښودو جرئت مې لا نه دي پيدا کړی ) زه تر اوسه دې ته نه يم اړ شوی چې د کور جوړولو لپاره د سمنټو، سيخانو او نورو لوازمو لپاره ، قوماندان يا والي خو څه کوې، د دوی د نوکرانو احسانونه هم په ځان ومنم.
واده مې ډېر پخوا کړی، هغه وخت دا کلتور نه و چې فرهګني، ژورناليست يا شاعر او ليکوال دې په ژړغوني بڼه د واده او کوژدنې ليست د پيسو خاوندانو مخ ته کېږدي، والي ته دې په عريضه کې د خسر له لاسه شکايت وکړي.
د هغو له ډلې هم نه يم چې غلو نه دې د خپل ملګري د سپکاوی په بدل کې څو روپۍ کلدارې تر لاسه کړي.
تاسې يې را ثبوت کړئ چې کله مو د کوم قوماندان په کور کې ( چاپلوسان يې د حويليو په نوم يادوي ) ليدلی يم؟
والي يا بل چارواکي سره د لیدو نور شاهدان هم زما دا ليکنه حتمی لولي، قسم دې وخوري چې زما خبرې به د سپین سترګي او ياغي افغان نه زره هومره کمې وي؟
په هغه څه ګوتې نشم خوځولای چې تاسې څو بې وجدانو د خپلو چوکيو او موقف ساتلو او ترلاسه کولو لپاره د ننګرهار ولس ته په ابدي شرم تمامه کړې ده او….
هر څوک چې يې! ( که څه هم څو تنو راته په وړه کړکۍ سړی راښوولی، که رښتيا وي نو دا ښاغلی مې مخامخ د شلو تنو مخکې دومره سپک کړی چې له وېرې يې سرباری بخښنه هم له ما غوښته) تر خپله وسه مې د ټول هېواد او په ځانګړې ډول د خپلې سیمې ننګرهار تور ته تور او سپين ته سپين ويلي. زه دې منندوی يم، تا وهڅولم او دا دی تا، ستا د لارې پټ مخي او بل هر يو ته بلنه درکوم چې د فيسبوک له لارې دا تېر لس کاله ژوند سره راميدان ته کړو چې چا د خپل ولس لپاره څومره څه کړي دي؟
د همدومره نارينتوب په هيله دې.