د انساني حرمت درناوی/ ډاکټر وقار احمد توقير

د دغه هوس او مرض ميکروب له جنګسالارانو، تنظيمي او جهادي مشرانو وروسته اوس ليکوالو ته هم لېږدېدلی. موږ يو چا ته په دې کاږه ګورو چې ولې يې زما په څېر فکر نه دی کړی، زما د خوښې پر ټکيو يې خوله نه ده بېرته، زما د زړه توري، کرښې نه دي کښلې؟

افغان هندوانو له خپله اړخه پرېکړه کړې چې سږ کال به هولي نه نمانځي، يا به يې په خپلو کورونو کې نمانځي. هغه وه چې د وړيا مشورو بازارونه ولګېدل، څوک يې پر ستاينه ودرېدل، چا د هولي پر نمانځنه اړ پېژندل.
د دې مانا دا چې موږ څوک خپلې خوښې، پرېکړې او غوراوي ته نه پرېږدو، بلکې د خپلې خوښې او پرېکړې پر تپلو يې اړ پېژنو، خپله دغه پرېکړه او خوښه د دوی په خير او ګټه ګڼو، ځانونه ترې هوښيار، درانه او تر دوی زيات د دوی په خير او ګټه ګڼو. په داسې حال کې چې هره تپنه استبداد دی.

موږ څوک يو چې د چا د خوښې او انتخاب پرېکړه وکړو او د هغوی د خپلې پرېکړې د ګټې او زيانونو په شمارلو ځانونه ستومانه يا په هغه مشهوره خبره، بې‌اوماچه خولې کړو؟

افغان هندوانو ښه پرېکړه کړې، ښه په دې خپله دغه پرېکړه يې له خپل انده، د خپل سوچ، کتنې او ارزونې له مخې کړې، ازاد او خپلواک تصميم يې نيولی، د چا د فشار له امله يې ځان په دغسې پرېکړه اړ نه دی بللی، ځکه خو يې د دې پرېکړې درناوی او هرکلی پر موږ لازم دی.

زما په فکر دغه تصميم د ترهګري د اندېښنې له مخې د انساني زيانونو د مخنيوي له‌پاره شوی چې د افغان هندوانو پوهه او بصيرت په ګوتو کوي.
خو موږ د هغوی دې پرېکړې ته د خپل ذهن، ذوق، سليقې او خوښې له مخې جلا جلا ډيزاينونه راباسو، له څو ورځو د دوی د دې پرېکړې په اړه د خپلې خوښې په شننو بوخت يوو.

په حقيقت کې دغه پرېکړه زموږ له‌پاره يو درس دی، هغه دا چې موږ څنګه د خپلو مذهبي ورځو او مناسبتونو له نمانځنې نه‌شو تېرېدلای. په داسې حال کې چې د دغسې نمانځنو له امله را منځ ته شوي زيانونه زموږ پر وړاندې دي.
دا شونې ده چې موږ دې د محرم «عاشورا» مراسم تر جوماتونو يا تکيه‌خانو يوې محدودې کچې ته را لنډ کړو.

د خپلو سياستونو د ځلولو له‌پاره د دهمزنګ د غميزې د مخنيوي په موخه د لاريونونو او مظاهرو له‌پاره پر بله لاره له غور سره د انساني زيانونو مخه ډب کړو؟
د دې پر ځای چې د نورو پر وړاندې خپله پوهه او هوښياري را وباسو، د نورو په پرېکړو کې د لاس‌وهنې حق خوندي وګڼو، غوره په خپل ګرېوان کې وګورو او په ځان کې د دغسې ظرفيت د پيدا کولو لټون ته ور وګرځو.

اسلام وايي که په جومات کې د جمعې لمونځ هم درڅخه تېرېده؛ نو په منډه مه ورځغله، همدا د انساني وقار او حرمت درناوی دی.
کله چې د انسان وقار او عزت دومره دروند ګڼل شوی، د انساني وينې او ژوند حرمت به په کومه کچه دروند تلل شوی وي؟
د دې مانا دا ده چې په اسلام کې انساني حرمت تر مذهبي مراسمو او عباداتو لوړ دی.

سرخط ورځپاڼه