بې سياسته لوبې ماشومان کوي/ بارکوال میاخیل

د افغانستان د کرکټ بورډ د مشر او د ده د پلويانو دا نظر چې وايي لوبې دي له سياسته لرې وساتل شي، د ده د هغه تړون لپاره يوه ړنده توجيه ده، چې د پاکستان له کرکټ بورډ سره يې لاسليک کړى دى. ما ډېر پخوا په هغه زمانه کې له کرکټ سره مينه لرله چې عمران خان کرکټ کاوه، خو بيا د ژوند ستړو له لوبو کتلو لرې کړم، خو په دې وروستيو کلونو کې د افغانستان هغه لوبې ضرور ګورم، چې له هند او پاکستان سره يې وي او له دغو لوبو خپل سياسي خوند اخلم. زه دلته نور هم په لسګونو کسان پېژنم، چې له کرکټ سره مينه نه لري، خو د افغانستان لوبې ګوري او خپله سياسي تنده په ماتوي، ځکه چې دوى له افغانستان سره د وينې او مينې رشته لري.
په ټولنيزو رسنيو کې چې له پاکستان سره د لوبو د وروستي تړون په اړه اکثريت افغانانو کوم عکس العمل څرګند کړ، دا خپل منطقي جواز لري او که څوک د دوى دا غبرګون بېځايه ګڼي، هغوى بيا په نړيواله کچه د لوبو په ډيپلومېسۍ او تر شا يې په سياسي پس منظر نه دي خبر، که نه وي د پاکستان په شمول ټوله نړۍ لوبې هم د خپلو سياسي تګلارو لپاره کاروي او د لوبو په وسيلو خپلو حريفانو ته روحي ماتې ورکوي او له دې لارې د خپلو خلکو مورال اوچتوي. خپله پاکستان هم په داسې حالت کې چې په سياسي ميدان کې په نړۍ کې تنها شوى دى، غواړي خپله د اوړو پوزه جوړه کړي او له افغانستان سره خپلې خرابې اړيکې د کرکټ په وسيله سمې کړي، نو که د افغان کرکټ بورډ مشر په داسې ترينګلو حالاتو کې له پاکستان سره د خپل هېواد سياسي او ډيپلومېټيکې اړيکې په پام کې ونه نيسي، نو دا نه يواځې دا چې د خپلو خلکو احساسات زخمي کوي، بلکې په نړيواله کچله د خپلې لوبډلې ګټلي نوم ته هم تاوان رسوي.