يو ناداره بوډا چې درست ولس يې پوروړی دی

بوډاګان زموږ په وطن کې هم پرېمانه دي، سهار راووځي، پتاوي ته ناست وي، نسوار کوي او بيا چې تاوده شي، کور ته ځي او پر ښځو پټه‌کې کوي، خو په نورو هېوادو کې بيا داسې بوډاګان هم شته چې له لویه تر واړه، له ماشومه تر زاړه يې هر کس د احسان پوروړی وي.
همداسې يو بوډا په بنګله دېش کې اوسي.
دغه بوډا عبدالصمد شيخ نومېږي او د بنګله‌دېش په فريدپور سيمه کې اوسي، په دوولس کلنۍ کې يې يو نيال کښېنولی دی او اوس څلوېښت کاله کېږي چې له هغې ورځې تر اوسه، مسلسل هره ورځ يو نيالګی کښېنوي.
ده تر اوسه پورې د پنځوس زره په شاوخوا کې نيالګي کښېنولي چې اوس په غټو غټو ونو بدل شوي دي.
عبدالصمد کاکا هره ورځ د نيالګي ايښودلو مرکز ته ورځي، يو نيالګی ورڅخه په خپلو پيسو اخلي او په دې کار ورته کله کله د ده مېرمن غوسه کېږي هم.
دی رکشه چلوي او د ورځې تقريبا د شپېتو يا اوياوو افغانيو په شاوخوا پيسې ګټي، په هماغو پيسو هم يو نيالګی اخلي او هم کور چلوي.
عبدالصمد کاکا وايي، دی هر سهار نويو نيالګيو ته اوبه ورکوي او که څوک تاوان ورورسوي، جنګ ورسره کوي.
په دې وروستيو کې يوې خيريه ادارې عبدالصمد کاکا ته دوولس سوه امريکايي ډالر انعام ورکړی دی.