حکومت دې د ټرمپ اوښانو ته دروازې لوړې کړي

په دغو بريدونو کې شل تنه شهيدان او څلوېښت نور ټپيان شول او بريدونه هم د څلورم ځانمرګي په مرګ پای ته ورسېدل.
دا د هغو بريدونو د لړۍ وروستی هغه و چې له تېر يوه کال راهيسې په هېواد کې پر شيعه مسلمانانو پيل شوي دي.

لومړی د روښنايي غورځنګ په لاريون کې ځانمرګی، تر هغه وروسته په کابل کې پر باقر العلوم جومات بريد، وروسته د کابل د الزهرا پر جومات بريد، تر هغه وروسته په هرات کې پر جواديه جومات بريد، بيا د ميرزاولنګ پېښه او اوس دغه د امام زمان جومات بريدونه چې تقريباً د ټولو پېښو مسووليت داعشيانو منلی دی.
موږ د دغو بريدونو د روا او ناروا خبره نه کوو، تر لمر روښانه ده چې په جومات کې پر لمانځه ولاړل کسان په شهادت رسول کېږي، دې کار ته روا ويل، د اسلام په رڼا کې پخپله کفر دی.

موږ پر دې هم خبره نه کوو چې د افغانستان ملايانو پرون د اريانا سعيد د سندرو پر ضد پايڅې تر تخرګونو راټولې کړې او سترګې تر غوږونو تورې کړې وې، تر خوله يې ځګونه بادېدل او په کابل کې يې چيغې وهلې، خو نن يې ګونګه روژه نيولې.

موږ ته دا هم ډېره مهمه نه ده چې د دې بريدونو مسووليت طالبانو منلی، که داعشيانو، دواړه د دې خاورې او خلکو دوښمنان دي.
موږ ته دغه بريدونه يوه بله بده ګواهي راکوي او هغه د دغسې خونړيو بريدونو زياتوالی دی.

د ټرمپ د سټراټېژي تر اعلان وروسته هم موږ ويلي وو چې پاکستان، ايران او روسيه به ارام نه کښېني. دغه درې واړه هېوادونه به تر خپله وسه پورې په افغانستان کې د جګړو اور ته پوکي ورکړي او د عامو وګړو تلفات به تر شمېر ووځي.

طالبان د روسيې په منتر کې دي، پاکستان ورته وسلې ورکوي او په ايران کې ځانګړی دفتر لري. داعشيان نيم پاکستاني اورکزي او نيم يې پنجابي سخت‌دريځي دي، حقاني شبکه په پاکستان کې دېره ده او نور نو هر سړی چې توپک يې په لاس کې دی، لکۍ يې د ايران او پاکستان تر پښه لاندې ده.

پاکستان، ايران او روسيه به اوس په افغانستان کې خپلو شته جګړه‌مارو ته نور فرمايشونه هم ورکړي، لا به يې خروړي کړي او وژنې به نور هم زور ونيسي.
حکومت چې لا له وړاندې د ترهګرو د بريدونو په مخنيوي کې پاتې راغلی، بې‌کفايتي او ناغېړي به يې د خلکو ژوند نور هم له خطر سره مخ کړي.

که حکومت په ځان کې د دا زور ليد چې د ترهګرو مټ نيولای شي او بيا يې د ټرمپ د سټراټيژي ملاتړ کاوه؛ نو نن د دغه شهيدانو خون د حکومت پر غاړه دی چې و يې نه ساتلای شوای، که يې په ځان کې د ترهګرو د مهار شېمه نه ليده او په تشه ګېډه کې د ټرمپ په ملاتړ چيغې وهلې، بد يې کول چې پردي اوښان يې د خپلې ړنګې دروازې مخ ته چو کول.

اوس لا هم وخت نه دی تېر، حکومت دې يا دروازې جګې کړي، يا دې لاس پورته کړي او واک دې نورو ته پرېږدي، يا دې سم ووايي چې ټرمپ بادار دی او د بادار اوبه په لوړه خېژول د دوی دنده ده.

سرخط ورځپاڼه