غرض او مرض

په هغه وخت کې چې حامد کرزي قانوني له کورنيو چارو وزارته پوهنې وزارت ته تبديل کړ، څو ورځې يې داخله وزارت په خپل ګورت کې برمته ساته، تر هغه چې د تاج محمد وردګ له‌پاره يې د کورنيو چارو د وزير په توګه د چوکۍ پرېښودو ته هو کړه.
له همدې ځايه د کورنيو چارو وزارت ټول ارګانونه ځانګړي تنظيم، قوم او سيمې لاندې کړي وو.
ښاغلي برمک خپله منلې چې د نظم عامه شپېته سلنه او بلوا ضد اتيا سلنه افراد تاجکان دي.

د نظم عامه په بلوا ضد يونټ کې چې د ساتنمنانو د ټاکنې په اړه کوم مکتوب قوم‌ګرايانه بلل شوی، هغه داسې دی لکه چا ته چې وايې غوږ دې سپي يووړ، خپل غوږ ته د کتو پر ځای په سپي پسې ځغاستې ته بډې پورته کړې.
لکه چې شمېرو ښوولې، په دغو ارګانونو کې وار له مخه د تاجکانو ونډه زياته ده، د دې له‌پاره چې قومي انډول په پام کې نيول شوی وي، په دغو ارګانونو کې د نورو قومونو پر شموليت ټينګار د دغه مکتوب اصلي محتوا ګڼل شوې.

دا سمه ده چې مکتوب ښايي په دغسې محتوا او عباراتو نه وای ليکل شوی، خو د مکتوب دغه عبارت هم د قوم‌پالنې يا قومي تصفيې مفهوم نه‌شي ښيندلای.
له بده‌بخته ځينې عناصر چې د قوم‌پالنې مرض او غرض په مخه کړي، همېشه په دې برخه کې کوږ فکر کوي، که څه هم په زړه کې ښه پوهېږي چې د مکتوب موخه دا نه ده، خو د خپلو شخصي ګټو له‌پاره يې پر حکومت د فشار غوغا ګرځولې ده.

د شهيد سردار محمد داوود خان په جمهوريت کې پر يوه عريضه د پوهنې وزير مرحوم پوهاند عبدالقيوم له احکامو دغو کړيو همدغسې يوه غوغا را پورته کړې وه.
پوهنې وزير ته يوه عريضه رسېدلې وه، عارض ځان د وردګو اوسېدونکی بللی و چې د ښوونکيو رياست لال او سرجنګل ته تبديل کړي، ده په خپل ولايت کې د دندې قانوني غوښتنه لرله، د وزير په احکامو کې راغلي وو چې «که عارض د وردګو وي او د ولايت اړوند ښوونځيو کې کمبود وي، په ودرګو کې دې مقرر شي.»

له دغو احکامو غرضي او مرضي کړيو دا را وايستل چې که ودرګ وي، مقرر دې شي. وروسته يې دا تبۍ او لکۍ ورسره يو ځای کړه چې که ودرګ وي مقرر دې شي، که پښتون وي انتظار دې وکړي، که تاجک وي وهئ يې!
سياسي اغراض د همدغسې امراضو د ميکروب ودې ته زمينه چمتو کوي او په ټولنه کې د افتراق او نفاق اور ته لمن وهي.

سرخط ورځپاڼه