د افغانستان، پاکستان او چین ترمنځ د ترهګرۍ پر ضد د ګډې مبارزې هوکړه

د چین د بهرنیو چارو وزیر وايي، هېواد یې له افغانستان او پاکستان سره په ګډه د ترهګرۍ پر ضد مبارزه کوي.
ښاغلي وانګ اې د درې واړو هېوادونو د ګډې ناستې په پای کې خبري غونډې ته وویل، په دې ناسته کې په څلورو مهمو موضوعاتو بحث شوی دی.
ښاغلي اې زیاته کړه، د افغانستان د سولې او ثبات په برخه کې د پاکستان او چین سربېره د سیمې د هېوادونو مرسته، د افغانستان او پاکستان د اړیکو ښه والی، د سیمه‌ییزو همکاریو دوام او همدا ډول له ترهګرۍ سره مبارزه د دې ناستې مهم بحثونه و.
((افغانستان، پاکستان او چین هوکړه وکړه چې د هغه ترهګرو پر وړاندې به جدې مبارزه کوي چې د ملګرو ملتونو له لورې د ترهګرو ډلو په نوم پېژندل شوې دي.))
په ورته وخت کې د هېواد د بهرنیو چارو سرپرست وزیر صلاح الدین رباني وايي، افغانستان له ترهګرۍ سره مبارزې ته ژمن دی، خو په دې برخه کې د ستونزو حل د یوه هېواد له توان پورته دی.
ښاغلي رباني زیاته کړه، افغانستان هیله لري چې له پاکستان سره یې اړیکې ښې شي، خو پاکستان ته په کار ده چې له ترهګرۍ سره ریښتني مبارزه وکړي.
((موږ ژمن یوو چې د ترهګرۍ له بېلابېلو ډولونو سره مبارزه وکړو، ولې هیله لرو چې نور هېوادونو هم لکه افغانستان د ترهګرۍ پر ضد ګامونه پورته او د هغوی پټن‌ځایونه له‌منځه یوسي.))
د بهرنیو چارو سرپرست وزیر له طالبانو یو ځل بیا وغوښتل چې د سولې لار ونیسي او له تاوتریخوالي لاس واخلي.
په دې غونډه کې د پاکستان د بهرنیو چارو وزیر خواجه اصف وویل، پاکستان امن افغانستان غواړي او په دې برخه کې یو ګډ پلان هم جوړ شوی دی.
((دا پلان څو میاشتې وړاندې افغانستان ته وړاندی شوی و، د افغانستان جمهور ريیس په باکو کې یو ځل بیا له دې پلان څخه ملاتړ وکړ. دا پلان کولای شي د ترهګرۍ پر وړاندې د دواړو هېوادونو ترمنځ جامع همغږي رامنځ‌ته کړي.))
د افغانستان او پاکستان ترمنځ د اړیکو د ښه کېدو په اړه دا ناسته داسې مهال کېږي چې افغان حکومت پاکستان تورنوي چې له افغانستان سره د اړیکو لپاره ښه نیت نه لري او تل یې دوه مخې لوبه کړې.