برېښنایي تذکرې ولې مهمې دي؟

برېښنایي تذکرې ولې مهمې دي؟

برېښنایي تذکرې د ښې حکومتولۍ د ترویج، د جرمونو د مخنیوي او کمولو، د شفافو ټاکنو ترسره کولو، د خدماتو برابرولو، د امنیت د تامین او نورو برخو کې فوق العاده مرسته کوي، نو له همدې امله مافیایي ډلې، بهرنیو استخباراتو پورې اړوند کسان او نورې بېلابېلې ډلې ټپلې په یوه او بله پلمه هره ورځ د برېښنایي تذکرو د وېش موضوع ځنډوي.

په لویه کې پخواني ولسمشر کرزي په لوی لاس دا موضوع د ملي یووالي حکومت ته د یو لوی سرخوږي په توګه پرېښوده، ځکه هغه مهال یې د دې موضوع لپاره نه په ولسي جرګه کې لازمه لابي وکړه او نه یې هم په خپل وخت کې قانون توشیح کړ.

ملي یووالي حکومت او ولسمشر غني په پوره جرئت سره په دې برخه کې خپل ملي دریځ نه یوازې اعلان کړ، بلکې د هغه ټینګ ملاتړ یې وکړ، د ولسي جرګې د ځینو پردیپالو وکیلانو د مقاومت او مخالفت باوجود یې د تذکرو د وېش موضوع له پارلمان څخه تېره کړه، خو بیا هم دوی هره ورځ په دې اړه غیر مسوولانه او د قانون خلاف څرګندونې کوي.

په دې کې شک نشته چې دوی د بهرنیو هېوادونو د استخباراتو په لمسون دا کار کوي. د بهرنیو هېوادونو موخه داده چې حکومت ته سرخوږی زیات کړي، تر څو افغانستان د حکومت د ملي او اقتصادي برنامو له برکته د پرمختللي او قوي نظام خاوند نشي او همدارنګه د اوبو مهارولو څخه د حکومت پام خپلمنځیو جنجالونو ته واړوي.

د هېواد په دغسې حساس پړاو کې د برېښنایي تذکرو د وېش په پلمه د بېلابېلو مخالفتونو او ستونزو را پیدا کول نه یوازې غیر قانوني کړنه، بلکې ستر ملي خیانت بلل کېږي او ښایي چې ولس په دې برخه کې پر حکومت مشروع فشار راوړي چې یا دې ژر تر ژره د تذکرو د وېش لړۍ پیل کړي او یا دې هم هغو افرادو او اشخاصو ته چې له خپل افغانیته منکر دي او په دې برخه کې ناسمې څرګندونې کوي، نو هغوی دې یا مجازات کړي او یا دې هم له هېواده وشړي.

هغوی چې له افغانیته منکردي هغوی د دې هېواد دعظیم ملت، ملي ارزښتونو او مقدساتو دښمنان دي. د بیان ازادۍ او ولسواکۍ څخه په ناوړه ګټه اخیستنه باید هغوی ته د دې اجازه ورنه کړل شي چې زموږ ملي ارزښتونه او مقدسات ترپښو لاندې کړي او په واز کومي د هغو د نقد او تحریف کولو جرئت دې وکړي.

په دې برخه کې د ولس غبرګون ډېر مهم دی. د سوله ییزو لاریونونو، لویو غونډو او نورو بېلابېلو بڼو دې د دغو منحوسو او د پردیو د لاسپوڅو کړنې وغندي او همدارنګه کې حکومت دېته وهڅوي چې دغه ناوړه افراد دې د قانون پنجو ته سپاري او د خپلو بدرنګه اعمالو په سزا دې ورسول شي.

په دې کې شک نشته چې داخلي مافیایي او مفسدې کړۍ هم د برېښنایي تذکرو د وېش مخنیوی کوي او په بېلابېلو پلمو خلک دې ته لمسوي چې خپل د اعتراض غږ پورته کړي، ځکه هر وخت چې د مافیاي ډلو ګټې په خطر کې شي، نو دوی بیا له ولس څخه د سپر او وسیلې په توګه ګټه اخلي او په دې کې شک نشته چې د برېښنایي تذکرو وېش د دوی د ګڼو جنایتونو مخه نیسي.

ډاکټر عبداللطیف کاکړ