د طالبانو په حرکتونو کې یو عجیب بدلون

په تېرو کلونو کې طالبانو تر یوه حده دخلکو د ملاتړ پروا کوله، مثلاً ښوونځي یې په اسانه نه سیزل او کله کله به یې په اعلامیو کې د ملکي خلکو د وژلو د مخنیوي لاپې هم کولې، خو اوس په دې کې بدلون راغلی، هم د ښوونځیو د سیزلو پېښې ډېرې شوې دي او هم په جلال آباد کې د معارف ملکي مامورین په ښکاره په نښه او ووژل شول. دا څرګندوي، چې نور نو پاکستان د طالبانو له سیاسي راتلونکي څخه ناهیلي شوی دی او پوهېدلی، چې طالبان په سیاسي ډګر کې نور په درد نه خوري ، د همدې لپاره یې له افغانستان څخه د انتقام اخیستلو وروستۍ هڅې پیل کړې دي، دوی په افغانستان کې له ښوونځيو، بندونو او نورو مهمو تاسیساتو څخه دخپل شکست انتقام اخلي، بېګاه یې په مچلغو بند حمله کړې او شاید دا پېښې زیاتې شي. پاکستان اوس نو د طالبانو د بدنامۍ او ولسي کرکې پروا نه ساتي او غواړي په افغانستان کې د خپلې لاسوهنې له امکاناتو څخه وروستۍ استفاده وکړي. په دې ورځو کې د طالبانو ویندویان هم نه شي کولای د دغو ملکي جنایتونو د توجیه او دلایلو توضیحات ورکړي. ښايي دوی هم نه پوهیږي، چې دا هرڅه څوک او ولې کوي؟ د سعودي تر غونډې وروسته د طالبانو ترمنځ ګډوډي پیل شوې ده او په دوی کې پاکستانۍ عناصرو د افغانستان بشپړې ورانۍ ته ملا تړلې ده، چې کېدای شي یوه لویه برخه طالبان دا نه غواړي. په صفوفو کې ماته او شکست له همدې ځایه پیل شوی، چې د طالبانو د پخوانیو اعلامیو او ژمنو پرخلاف اوس ښوونځي او معارف په نښه کیږي، ځکه دولت د دغو تاسیساتو د ساتنې لپاره لوړ احظارات نه لري.
ځينې ګونګوسې داسې هم دي، چې طالبانو د آی اس آی ځینې خبرې نه دي منلي، ځکه خو پاکستانیان غواړي طالبان بدنامه کړي او یا یې وګواښي، چې که د دوی فرمایشات ونه مني، نو په افغانستان کې به د دوی د پراخې بدنامۍ لپاره داسې اقدامات وکړي.