داسې فونټ جوړ شوی، چې حافظه پياوړي کوي/ ژباړه: اجمل روهي

اسټراليايي څېړونکو داسې فونټ (ليکبنه، خط) جوړکړی، چې په لوستلو سره يې حافظه پياوړي کيږي او مطلب ښه زده کيږي او زده کوونکو سره د مالوماتو په یادولو کې مرسته کوي. دغه ليکبڼه د ملبورن پوهنتون لخوا جوړه شوې او د Sans Forgetica نوم ورکړل شوی.
د دغه فونټ په جوړولو باندې کارپوهانو ډېره موده کار کړی دی او په درې نسخو کې جوړ شوی. په يوه آزموينه کې چې په ۴۰۰ تنو محصلينو باندې تر سره شوه، پایله دا وه چې هغه محصلينو چې د Sans Forgetica په فونټ باندې مطالب لوستي وو، تر هغو نورو چې د Arial فوڼت باندې لوستي وو، ښه یاد کړي او زده وو.
د ملبورن پوهنتون استاد سټېوان بانهام وايي، چې په دغه ليکبڼه کې ۷ درجې کيڼ اړخ ته میلان (کوږوالی) او په حروفو (توريو) کې خالي ځایونه شته. د ده په وينا چې دا ليکبڼه هغه زده کوونکو ته چې امتحان ته تیاری نيسي، يا هغه څوک چې بهرنۍ ژبې زده کوي او یا د لوی عمر کسان چې حافظې يې کمزورې شوي دي، په زده کړې کې مرسته کوي.
د سټېوان بانهام په وينا، چې دا ډول فونټ د دې لامل ګرځي، چې د متن لوستل مشکل کړي او حافظه تحريک کړي او ذهن په طبيعي ډول سره هڅه کوي، چې خالي ځایونه ډک کړي او په دې توګه توري ځان لپاره د لوستلو وړ وګرځوي. دغه ليکبڼه داسې جوړه شوې، چې مغز دې ته هڅوي چې ډېرې زېرمې ته ځای ورکړي.
استاد سټېوان بانهام چې تر اوسه ۲۰ ډوله فونټونه جوړ کړي وايي، چې لا هم د دغه فونټ د کارولو په وړاندې خنډونه شته، ځکه څوک حاضر ندي چې یو داستان په دغه ليکبڼه سره چاپ کړي، ځکه سرخوږی به پيدا کړي، خو له دې سره سره هيله مندي ورته شته.
یادونه: زموږ په پښتو ليکبڼو کې هم ورته نمونې شته، چې د دې اغيز به څنګه وي؟!