سوله اوس را ځي؛ امريکا او افغان حکومت يوه خوله شول

له هغه وروسته چې د افغان سولې لپاره د امریکا د بهرنیو چارو وزارت ځانګړي استازي په قطر کې له طالب استازیو سره پرله‌پسې شپږ ورځې پر افغان سولې خبرې وکړې، ورسره هم‌مهاله له افغانستانه د امریکايي ځواکونو د وتلو، د لنډمهالي حکومت جوړولو او یو شمېر نورو موضوعاتو په اړه بحثونه تاوده شول چې په‌ دې سره افغان حکومت هم د دغوو مسایلو په اړه توند غبرګون وښود.
ولسمشر غني وویل، د افغان سولې په اړه هيچا ته د خپلسرو پرېکړو اجازه نه ورکوي، د لږکیو له لوري دا خبرې پایلې ته نه‌شي رسېدای او تر اوسه داسې زوی مور نه ‌دی زېږولی چې د پټو معاملو هوکړه‌لیکونه پرې لاسلیک کړي.
خو زلمي خلیلزاد بیا ولسمشر اشرف غني ته نامستقیم ویل چې د سولې لپاره دې خپله څوکۍ قرباني کړي. د دې تر څنګ خلیلزاد ټینګار کاوه چې د افغان سولې په اړه یې له طالبانو سره خبرې وروستۍ شوې نه ‌دي او نه یې هم کومه هوکړه ورسره کړې ده.
اوس ولسمشري ماڼۍ وايي چې ولسمشر غني له زلمي خلیلزاد سره په وروستۍ لیدنه کې د سولې خبرو اترو د پر مخ بیولو لپاره پر نویو لارو د کار هوکړې ته رسېدلی دی.
د ولسمشر ویاند هارون چخانسوري د دغې هوکړې د جزیاتو په اړه وايي، د افغان سولې په اړه د افغانستان او امریکا تر منځ د نظر اختلاف نه‌شته او تر اوسه چې په دې برخه کې کوم اقدامات شوي، لومړني دي او تر دې وروسته به افغان حکومت له زلمي خلیلزاد سره د یوې واحدې تګلارې له مخې، د سولې پروسه پر مخ یوسي.
په همدې حال کې زلمي خلیلزاد ویلي چې هېواد یې د افغان حکومت په مالکیت د سولې خبرو اترو ته جدي دی او داسې تلپاتې سوله غواړي چې ټول ارزښتونه پکې وساتي او په افغانستان کې د ۴۰ کلنې جګړې د پای لامل شي.
نوموړي هم ټینګار کړی چې د سولې په برخه کې له افغان حکومت سره واحد نظر لري او هڅه کوي چې خپل ټول فعالیتونه له حکومت سره په سلا مشورې او همغږي پر مخ یوسي.
بل ‌خوا د سیاسي چارو شنونکي د افغان سولې پروسې په برخه کې د افغان حکومت او امریکا واحد نظر او همغږي د دې پروسې د بریا لپاره مهم بولي او وايي، دواړه لوري دې د ګډو موخو او ګټو لپاره خپله همغږي نوره هم زیاته کړي.
د پوهنتون استاد او د سیاسي چارو شنونکی عبیدالله وردګ وايي، له افغان حکومت او امریکا پرته په افغانستان کې د سولې راتلل ناشوني دي؛ نو په ‌کار ده چې په یوه واحد قوت له وسله‌والو طالبانو سره د سولې مېز ته کېني او دا مهمه پروسه بریالۍ کړي.
د نوموړي په وینا، اوس چې د افغانستان او امریکا حکومتونه په خپلو کې د سولې خبرو اترو د پر مخ بیولو لپاره پر يوې کار لارې هوکړې ته رسېدلي، لرې نه ده چې د افغان سولې روانه پروسه بریالۍ او په هېواد کې روانه څلوېښت کلنه جګړه چې قرباني یې یوازې افغانان ورکوي، پای ته ورسېږي.
مدني فعال شریف‌الله وفا هم باور لري چې د سولې پروسې په برخه کې د افغان حکومت او امریکا تر منځ د اختلافونو پر ځای، همغږي او واحد نظر به دا پروسه د بریا خوا ته نږدې کړي او که تر پایه همداسې ګډ نظر ولري، افغانان به ډېر ژر د یوې تلپاتې او رښتینې سولې شاهدان واوسي.
دا په داسې حال کې ده چې ټاکل شوې وه، د طالبانو استازي د دوشنبې په ورځ په اسلام‌اباد کې له زلمي خلیلزاد او د پاکستان له لومړي وزیر عمران خان سره وګوري، خو افغان حکومت په دې اړه ملګرو ملتونو ته شکایت وکړ؛ امریکا او ملګرو ملتونو د طالبانو استازیو ته د پاکستان د سفر اجازه ور نه ‌کړه او د دغه غونډه لغوه اعلان شوه.
ټاکل شوې د افغان سولې لپاره د امریکا د بهرنیو چارو د وزارت ځانګړی استازی زلمی خلیلزاد د فبروري په ۲۵مه نېټه یو ځل بیا په قطر کې له طالب استازیو سره وګوري او پر افغان سولې ورسره خبرې وکړي.

سرخط ورځپاڼه