ولسمشر غني له پاکستان سوله نه، بلکې ژمنه غواړي

اېمل پیاوړی-

حامد کرزي به ویل چې د پاکستان له همکارۍ پرته په افغانستان کې سوله نه راځي او د دې پرځای چې وسله والو طالبانو ته مراجعه وکړي، نو بار بار یې پاکستاني مقاماتو ته مراجعه کوله او له هغوی څخه یې غوښتل چې وسله وال طالبان دې د سولې او مذاکراتو مېزه ته راولي، مګر د ولسمشر غني هیله او غوښتنه مطلق متفاوته ده. هغه هیڅ وخت له پاکستان څخه نه غواړي چې وسله وال طالبان دې سولې ته راولي، یا دې مذاکراتو ته حاضر کړي او یا دې په دې برخه کې کوم بل داسې اقدام وکړي چې د طالبانو د هڅونې لامل شي.

بلکې ولسمشر غني له پاکستان څخه دوه شیان غواړی لومړی دا چې خپل نااعلان شوی جنګ دې ودروي، خپلې اړیکې دې له طالبانو سره یا واضح کړي او یا دې پرې کړي. په دویم قدم کې دې دا ژمنه وکړي چې له وسله والو طالبانو سره به په افغانستان کې د جنګ، وراڼي او تروریستي بریدونو د ترسره کولو لپاره هیڅ ډول همکاري هم نه کوي. دا نهایت مهمه ژمنه ده او تر هغو چې پاکستان دا ژمنه په عمل کې ثابته نه کړي، نو د سولې خبرې بې مانا دي، حتی له پاکستان سره د اړیکو لرل بې مانا دي، نو بیا ښه ده چې د پاکستان او افغانستان اړیکې همدا د اوس غوندې خړې پړې وي.

پاکستان باید عملا دا هر څه د افغانستان لوري ته ثابت کړي او د هغوی ډاد او باور ترلاسه کړي، له هغه وروسته د دواړو هیوادونو په اړیکو کې ښه والی راتللی شي. که چېرې پاکستان دا ځل هم خپله ژمنه عملي نه کړي، نو بیا به هیڅ وخت هم ولسمشر غني ورته مخ را وانه ړوي. په افغانستان کې روان جنګ څو بعدي دی له دې امله لومړي ګام کې لومړیتوب دادی، چې د دولت مناسبات له دولت سره د خلکو له خلکو سره، د پاکستان خلکو او دولت سره مناسباتو ته په جلا توګه وکتل شي، د دولت له دولت، خلکو او خلکو ترمنځ مناسباتو ترمنځ تفکیک وشي.

موږ اول د دوه هېوادونو ترمنځ سولې ته اړتیا لرو. تر هغو چې د پاکستان له خوا نیابتي جګړه روانه وي، که په هر دلیل وي، چې هغوی تحمل، حمایه یا تشویق کړي، موږ د دولت له دولت مشکل سره مخ یوو. 

څو کاله وړاندې ولسمشر غني جیو تلویزیون سره په مرکه کې ویلي وو چې ”موږ له پاکستانه سوله نه غواړو، موږ ژمنه غواړو، دولت په دولت تعهد .. داسې تعهد چې یو دولت یې بل دولت ته ورکوي، موږ به په دغه برخه کې هڅه کوو او هڅه به وکړو. خو دا مهمه وه چې د معضلې هغه بعد ته رسیدګي وشي چې پاکستان سره مستقیم پيوند لري، لکه تاسو چې مخکې وویل، هغوی مهم اعلان کړی دی، خو موجه نه دی. تروریزم نشي تفکیک کولی، څه شي ته چې تاسې اشاره وکړه، د مقاماتو له نقل قوله چې ښه او بد تروریزم موجود دی، دا ادعا موږ ته  د منلو نه ده.“

دا به نو وخت ثابته کړي او د ولسمشر غني له سفر وروسته به په ډاګه شي چې پاکستان خپل فکر او دریځ بدلوي او که همغه زوړ ملا او زړې تراوې دي.