خلک د قانون حاکمیت غواړي

تر پنځه کاله وړاندې پورې پر امنیتي او دفاعي ځواکونو نه دغومره باور موجود وو لکه نن چې ورباندې کېږي، نه یې دغومره ولسي ملاتړ کېده، لکه نن یې چې لري او نه یې هم دغومره محبوبیت درلود، لکه نن یې چې ولسونه ورسره لري. دا هر څه تصادفي نه دي راغلي، بلکې دا د ولسمشر غني د فکر، هڅـو، ملاتړ او هغو اصلاحاتو پایله ده چې په تېرو پنځو کالو کې یې د امنیتي او دفاعي ځواکونو په لیکو کې راوستي.

پنځه کاله وړاندې خلک د پولیسو له چلند څخه تر پوزې رسېدلي و او حتی په ښارونو او لویو لارو کې به چې کومه پېښه وشوه، نو خلکو به تر ډېره دا شک درلود چې په دې مسله کې د پولیسو لاس وو، مګر نن خبره برعکس شوې ده، نن په هر ځای او هره ګوښه کې پولیس د هرې بدې پېښې او جنایت د مخنیوي لپاره تر ټولو لومړی ځان رسوي او په تېرو پنځو کالو کې چې څومره پولیس بدل شوي او اصلاح شوي، نو همدومره د ولس باور، ملاتړ او محبوبیت هم ورسره زیات شوی دی.

د وکیلانو او پولیسو ترمنځ په پلڅرخي ساحه کې جنجال د پولیسو د بې کچې مینې او محبوبیت ښه نښه او مثال دی، ځکه دا دوه درې ورځې موږ ګورو چې په ټولنیزو رسنیو کې ټول خلک د خپلو ملي پولیسو تر شا ولاړ دي او دوی له دې امله د پولیسو ستاینه کوي چې د وکیلانو موټر یې ودرولي، تالاشي کړي، د دوی بې اسناده د تورو ښیښو لرونکي موټر او وسلې یې ورڅخه ضبط کړي دي.

له دې څخه دا پیغام هم ترلاسه کېدلای شي چې زموږ ولسونه د قانون د حاکمیت ټینګ ملاتړي دي، که ملي پولیس او اجرائیه قوه نور همت هم وکړي او د مجرمینو او زورواکانو پر وړاندې ودرېږي، نو خلک به یې په سرونو وګرځوي او د دوی هر ډول حمایت به وکړي. په تېرو دوه درې ورځو کې وکیلا ن سخت پیکه شول، ځکه هر چا د دوی کړنې وغندلې او له دې امله یې بد ورباندې وویل چې ولې د پولیسو د اوامرو اطاعت نه کوي او ولې دوی ځانونه له قانون څخه لوړ ګڼي، په داسې حال کې چې د مقننه قوې د غړو په توګه دوی د قانون جوړونکي دي او باید د قانون په تطبیق کې همکار واوسي، نه دا چې ناغېړی وکړي. له جګړو، ناامنیو او بې قانونیو څخه زموږ ولس تر پوزې رسېدلی دی او نور یې د زغم تاب نه لري.