زاخېلوال: د ضعف هغه نقطې له منځه وړو چې پاکستان یې د فشار لپاره کاروي

د ضعف هغه نقطې له منځه وړو چې پاکستان یې د فشار لپاره کاروي

د افغانستان سفير ډاکټر عمر زاخېلوال له پژواک خبري اژانس سره د يوې ځانګړې مرکې په ترڅ کې کړې دي.

هغه د پاکستان او افغانستان د اړيکو د ترينګلتيا په اړه ويلي، څو پورې چې پاکستان  خپلو تګلارو ته بدلون ورنه کړي، دا حالات نه ښه کېږي.

د زاخېلوال په وينا، د اړيکو د ترينګلتيا او خرابوالي ډېر زيان پاکستان ته رسېږي او پاکستان به د دې لوړه بيه پرې کوي.

ده زياته کړې: ((موږ د پاکستان په اړه د خپل ضعف نقطې په ګوته کړې دي، اقتصاد، ترانزيټ او په دغه هېواد کې د افغان کډوالو اوسېدل.))

د افغانستان سفير وايي چې پاکستان تل د افغانستان د ضعف له دغو نقطو څخه د فشار په توګه کار اخيستی دی.

زاخېلوال زياتوي: ((خو اوس موږ هڅه کوو چې له دغه فشار څخه په تدريجي ډول ځان وباسو له منځنۍ اسيا هېوادونو سره مو اقتصادي او سوداګريزې اړيکې پياوړې شوې، د چابهار بندر له لارې له نورو هېوادونو سره سوداګريزه راکړه ورکړه پيل شوې ده.))

نوموړي ويلي چې له تېرو دوو مياشتو راهيسې خپل هېواد ته د افغان کډوالو د بېرته تګ لړۍ تېزه شوې ده او اوس هره ورځ سلګونه کورنۍ ستنېږي.

د ولسمشر ځانګړى استازى وايي، د (خپل وطن ګل وطن) په نامه پيل شوې پروسې هم په دې برخه کې مثبته اغېزه کړې ده.

د ډاکټر زاخېلوال په وينا، هېواد ته د کډوالو ستنېدل افغانستان او کډوالو دواړو لپاره سياسي، اقتصادي او امنيتي ګټې لري.

ده زياته کړې: ((په هېواد کې چې اوس ٣٠ ميلېونه وګړي اوسېږي، که دوه درې ميليونه پرې زيات شي، کومه اغېزه نه لري.))

د نوموړي په وينا، ډېر ژر به له ولسمشر اشرف غني سره وګوري او له هغه به وغواړي چې راستانه شوو کډوالو ته يوه يوه نومره ځمکه ورکړي.

د افغانستان سفير وايي چې د طالبانو ځينو مشرانو هم ورسره اړيکه نيولې او غواړي چې خپل هېواد ستانه او د عزت ژوند تېر کړي.

هغه ويلي: ((زه ورته هرکلى وايم او ډاډ ورکوم چې په هېواد کې به له ټولو مدني حقونو څخه به برخمن وي.))

ډاکټر زاخېلوال وايي چې پخوا په افغان کډوالو کې ملي انګېزه نه وه، خو اوس په کې پيدا شوې ده، هغوى اوس درک کړې چې بايد په خپل هېواد کې د عزت ژوند پيل کړي.

د افغان سفير په وينا، د افغان کډوالو پاتې کېدل، د پاکستان په ګټه ده؛ ځکه چې دغه هېواد هر کال له افغان کډوالو ميلياردونه کلدارې عايد ترلاسه کوي.

د سولې د خبرو په هکله ډاکټر زاخېلوال ويلي چې افغانستان نور پر پاکستان بې باوره شوى دى؛ ځکه چې د پاکستان هڅې صادقانه نه وې.

خو چين ته د طالبانو وروستي سفر ته په اشارې سره یې ويلي چې پاکستان اوس هڅه کوي د چين په مرسته د سولې پروسه له سره پيل او له لاسه ورکړى باور بېرته ترلاسه کړي.

د هغه په وينا، چين په سيمه کې او نړۍ کې د يو ځواکمن هېواد په توګه کولى شي چې د افغانستان په سوله کې مهم رول ولوبوي؛ ځکه چې د افغانستان سوله د چين لپاره هم ګټوره ده.

زاخېلوال وايي چې د شرقي ترکستان شخړه، په سيمه کې د طالبانو او داعش وسله والو فعاليتونه هم چين ته اندېښنې پيدا  کړې دي.