فلم“مبارکان” د ارجون کپور نیمګړی ارمان پوره کړ!/ ایمل مړوند

هندي ځوان فلمي ستوری ارجون کپور په خپل نوي مزاحیه راتلونکی فلم “مبارکان” کې ډبل رول لوبولی چې د جولای میاشتې پر ۲۸ مه به نندارې ته وړاندې کیږي.

ارجون کپور د هندي فلمونو د تکړه پروډيوسر “بوني کپور” زوی او د “انیل کپور” وراره دی چې په خپلو لومړنیو دوه پرله پسې فلمونو کې يې د ښه کار کولو له امله د ځان له پاره ګڼ مینه وال پیدا کړي.

ارجون کپور نن سبا د هندي سینما د ځوانو وتلو او مشهورو فلمي ستورو په کتار کې ښه روان دی او هر نوی فلم يې ګڼ لیدونکي لري چې ورسره يې د مینه والو شمېر هم ورځ تر بلې ډېریږي.

هغه په تېرو پنځو کلونو کې په اتو فلمونو کې مرکزي رولونه لوبولي چې دوه يې ناکام او پاتې درې فلمونو يې پرله پسې بریاوې خپلې کړي دي.

د نوموړی وروستی فلم چې له تمې کمه کټه يې وکړه، “ هاف ګرل فرینډ” و چې فلم جوړونکی يې له بازار او ګټې خوښ نه و.

ارجونو کپور هندي رسنیو ته ویلي “مبارکان” فلم يې د کلونو کلونو نیمګړی ارمان هم پوره کړ. د هغه په وینا د خپل سپورسټار تره انیل کپور سره يې په فلم کې د یو ځای کار کولو ارمان له ډېر پخوا په زړه کې و، خو کله يې هم انیل کپور ته په دې اړه څه نه وو ویلي.

ارجون ویلي ان، له کوچینوالي د انیل کپور د فلمونو او د هغه د اداکارۍ مینه وال و او له کومې ورځې چې سینما ته راغلی، نو انیل کپور سره يې په فلم کې د ګډ کار کولو ارمان هم د ځان سره راوړی و چې ایله اوس په “مبارکان” کې پوره شو.

“مبارکان” یو مزاحیه فلم دی چې ارجون کپور په کې ډبل رول لوبوي او مشهور فلمي ستوری انیل کپور هم په کې لوبیدلی دی.

ارجون کپور وايي، په فلم “مبارکان” کې د هغه دواړه رولونه تر یو بل بیخي جلا دي او د ثبتولو پر مهال ده باید هره صحنه دوه ځله بیخي جلا جلا ثب کړې وه چې دا کار ورته سخت خو د زده کړې ښه چانس و.

هغه زیاته کړې، “مبارکان” کې يې خپل رولونه په پوره مسولیت سره ترسره کړي دي او هڅه يې کړي چې کردارونه يې لیدونکي خوښ کړي.

مشهور فلمي ستوري “انیل کپور” هم د خپل وراره ارجون کپور سره پر لومړي ځل په “مبارکان” فلم کې لوبیدلی دی چې د جولای میاشتې پر ۲۸ مه به نندارې ته وړاندې شي.