مایک پنس؛ پاکستان اوس هم له ترهګرو ملاتړ کوي

د امریکا مرستیال جمهور ريیس وايي، پاکستان ترهګرو او طالبانو ته خوندي پناه ځایونه ورکړي او دا هېواد لا هم له امریکا سره دوه مخې لوبه کوي.
مایک پنس په بګرام هوايي اډه کې امریکايي عسکرو ته په وینا کې پاکستان ته خبرداری ورکړ چې نور به هغه تهدیدونه عادي و نه نیسي چې دوی ته مخامخ دي.
((تاسې ته مالومه ده چې پاکستان له ډېرې مودې راهیسې طالبانو او نورو ترهګرو ډلو ته خوندي ځایونه ورکوي، دا وخت اوس پای ته ورسېد. پاکستان به له امریکا سره په ملګرتیا کې ډېر څه تر لاسه کړي، خو پاکستان به ترهګرو ته د خوندي ځایونو په ورکولو سره ډېر څه له لاسه ورکړي.))
د امریکا مرستیال جمهور ريیس همدا ډول افغانان او افغان ځواکونه وستایل چې د ترهګرۍ پر وړاندې د مبارزې په لاره په لومړۍ کرښه کې ولاړ دي، خو ډاډ یې ورکړ چې امریکا به یې اوږه په اوږه ملاتړې وي.
(( د جمهور ريیس ټرمپ تر مشرۍ لاندې امریکايي ځواکونه به په افغانستان کې تر هغه له ترهګرۍ په مبارزه بوخت وي، څو چې د امریکا خاورې او خلکو ته د دوی ګواښ د تل له‌پاره پای ته نه وي رسېدلی.))
د امریکا مرستیال جمهور ريیس باور وښود چې افغان ځواکونه بري ته نږدې شوي او ژر به افغانستان سولې او ثبات ته ورسېږي.