آیا د ماشومانو بدني سزا اغیزمنه ده؟

ژباړه: عطا محمد میاخېل

ډېری والدین کله وخت دې ته اړ کېږي، چې خپلو ماشومانو ته سزا ورکړي، آیا دا کار اغېزمن دی؟ څېړنو ښودلې، هغه ماشومان چې په کم عمر کې سزا ورکول کېږي، له پنځه کلنۍ څخه وروسته، له ځانه تهاجمي چلندونه څرګندوي.

د هغې څېړنې پر بنسټ، چې د تولان نیواور لئان په پوهنتون کې ترسره شوې، کومو ماشومانو ته چې په درې کلنۍ کې بدني سزا ورکول کېږي یانې وهل او ټکول کېږي، له پنځه کلنۍ وروسته له ځانه سر غړونکي چلندونه ښکاره کوي.

د دې څېړنې پایله، چې د امریکا د ماشومانو طب په خپرونه کې خپره شوې، څرګندوي هغه ماشومان چې په پرله پسې توګه وهل او ډبول کېږي، د هغو ماشومانو په پرتله چې هېڅ بدني سزا نه ورکول کېږي، له پنځه کلنۍ څخه تهاجمي چلند پیدا کوي.

د څېړونکو په وینا، بدې خبرې کول، چیغې وهل، له نورو سره په ورانیو او ګواښونو لاس پورې کول، د هغو ماشومانو د تهاجمي چلند نښه ده، کوم چې وهل او ډبول کېږي.

د امریکا د ماشومانو د طب اکاډمۍ امریکایي کورنیو ته سپارښتنه کړې، چې د بدني سزا پرځای له بلې اغېزمنې تګلارې څخه کار واخلئ، چې عبارت ده له: د دېوال یوې ګوښې ته د ماشوم محدودول، ځکه دا تګلاره ماشوم ته دا موکه په لاس ورکوي، چې د خپل چلند او د پایلو په اړه یې فکر وکړي.

د کاټرین ټېلر په نامه یو امریکایي څېړونکی په دې باور دی، که چېرې والدین د ماشومانو له وهلو او ټکولو څخه ډډه وکړي او له بدني سزا څخه پرته نورو تګلارو څخه کار واخلي، نو ماشومان به هم په لوړ عمرۍ کې، له ځانه ښه چلندونه ښکاره کړي.