د تړون اونيزې شپږمه ګڼه له چاپه راووته

د تړون اونيزې شپږمه ګڼه له چاپه راووته چې په بېلا بېلو سياسي، فرهنګي او ټولنيزو مسايلو په کې ليکنې راټولې شوې دي.

د اونيزې سرليکنه ” وژلو ته پيدا ولس!” تر عنوان لاندې ليکل شوې ده.

د سرليکنې ليکوال وايي:” د افغانانو وينې دومره ارزانې شوې چې نن د دوى وژل کېدل هم ځينو ته طبيعي ښکاري او داسې فکر کوي چې دا خلک بايد د چاودنو او سر پرې کولو په واسطه ووژل شي نه په طبيعي مرګ.” په سرليکنه کې په افغانستان کې د تېرو څوارلس کلونو ناخوالو او ترهګريزو بريدونو ته په اشارې ويل شوي چې دا د دوه مخي سياست او شيطاني پاليسو پايله ده چې په اساس يې نړيوال هم په دې ونه توانېدل چې په دې هېواد کې له ترهګرۍ سره روانه جګړه لکه څه ډول چې لازمه ده په هغه شان بريالۍ کړي.

په پاى کې راځي چې کېداى شي نور له دې حالاتو د افغانانو د صبر او زغم کاسې ډکې شي، خو دا ډول ولسي بې حوصله ګي به د دې سبب شي چې بيا به خبرې له ډيپلوماسۍ تېره وي او د تاريخي روايت له مخې به خپل غچ اخلي.

دې سره خوا کې د اونيزې په نورو پاڼو کې بېلا بېل مسايل لکه:” د امريکا، افغانستان او پاکستان لوبه په کومه روانه ده؟”، ” د ازادۍ جشن په برم او پرتم ولمانځل شو”، ” پرته له ځمکې په نورو ستورو کې هم هوښيار ژوي شته؟”، ” د افغان حاجيانو لومړۍ ډله سعودي عربستان ته ورسېده”، ” امريکا مېشتي افغانان د پاکستان پر ضد مبارزه کوي”، ” هغه خواړه چې دماغ اوونيم کاله ځوان ساتي”، ” ٥٤ کاله وروسته امريکا په کيوبا کې خپل سفارت پرانېست”، ” ډېر کاري فشار د ګوزڼ لامل کېداى شي” او همدا ډول د شعر مينوالو لپاره هم د رنګينې پاڼې په نوم ځانګړي شعرونه راټول شوي دي.

تړون اونيزه چې محتوا يې سياسي، فرهنګي، ټولنيز، علمي او معلوماتي مسايل تشکليوي د دې اونۍ ګڼه يې هم په همدې مسايلو مزينه شوې ده چې د هرې طبعې لوستونکي تنده خړوبولى شي.

د مطبوعاتو مينوال کولى شي چې د تړون اونيزه د خوست ښار په ټولو کتابتونو کې، د پکتيا ولايت په ټولو کتابتونونو کې او د کابل ښار په بيهقي کتابپلورنځي کې تر لاسه کړي.